លោក Keisuke Honda អ្នកចាត់ការទូទៅក្រុមជម្រើសជាតិកម្ពុជា បានបង្ហោះនៅលើទំព័របណ្ដាញសង្គមហ្វេសប៊ុកផ្លូវការរបស់ខ្លួន កាលពីល្ងាចថ្ងៃទី១២ ខែកញ្ញា ឆ្នាំ២០១៨ ដើម្បីផ្ញើសារ អរគុណអ្នកគាំទ្រដែលបានចូលរួមទស្សនាផ្ទាល់ នៅពហុកីឡដ្ឋានជាតិ ក្នុងការប្រកួតរវាង កម្ពុជា និង ម៉ាឡេស៊ី កាលពីដើមសប្ដាហ៍នេះ។
អ្នកគាំទ្រយ៉ាងច្រើនកុះករ បានចូលរួមទស្សនាការប្រកួតរវាងកម្ពុជា និងម៉ាឡេស៊ី កាលពីថ្ងៃទី១០ ខែកញ្ញា ឆ្នាំ២០១៨
Honda បានសរសេរថា៖ «ខ្ញុំសូមអរគុណអ្នកគាំទ្រ ដែលបានចូលរួមទស្សនានៅពហុកីឡដ្ឋានជាតិ។ ពិតប្រាកដណាស់ ពួកយើងនឹងវិវឌ្ឍខ្លួនបន្តិចម្ដងៗ ហើយពួកយើងកំពុងបង្កើតទម្លាប់ល្អៗនៅក្នុងក្រុម។ ក្រុមល្អមួយ មិនអាចកើតឡើងបានក្នុងពេលត្រឹមតែមួយថ្ងៃនោះទេ»។
Honda បង្ហោះនៅលើទំព័រហ្វេសប៊ុកផ្លូវការរបស់ខ្លួន
សូមរំឭកថា ក្រុមជម្រើសជាតិកម្ពុជា បានប្រកួតចាញ់ ម៉ាឡេស៊ី ដោយលទ្ធផល ១-៣ នៅពហុកីឡដ្ឋានជាតិ រាជធានីភ្នំពេញ។ ខ្សែការពារ សឿយ វិសាល បានស៊ុតបញ្ចូលទីម៉ាឡេស៊ី ជួយឲ្យកម្ពុជា នាំមុខមុននៅនាទី១៨។ ប៉ុន្តែចូលដល់តង់ទី២ ក្រុមភ្ញៀវ លេងបានយ៉ាងល្អ ដោយបើកការវាយបកយកឈ្នះម្ចាស់ផ្ទះវិញ បានដល់ទៅ៣គ្រាប់ នៅនាទី៦៤, ៧៤ និងនៅម៉ោងបន្ថែម។
នេះជាការដឹកនាំលើកទី១ របស់ Honda នៅក្រុមជម្រើសជាតិ បន្ទាប់ពីត្រូវបានតែងតាំងជាអ្នកចាត់ការទូទៅថ្មី កាលពីខែសីហា កន្លងទៅ។ ក្នុងការប្រកួតបន្ទាប់ កម្ពុជា នឹងត្រូវប៉ះក្រុមជម្រើសជាតិទីម័រខាងកើត នាថ្ងៃទី១២ ខែតុលា ឆ្នាំ២០១៨ នៅពហុកីឡដ្ឋានជាតិ៕
Honda និងលោក Felix គ្រូបង្វឹក នៅក្នុងការប្រកួតរវាងកម្ពុជា ទល់នឹង ម៉ាឡេស៊ី កាលពីថ្ងៃទី១០ ខែកញ្ញា
អត្ថបទ៖ លាភ.
No comments:
Post a Comment