ធ្លាយរឿងកាន់តែច្បាស់ អ្នកបម្រើរៀបរាប់គ្មានសល់ (មានវិដេអូ) ករណីឃាតកម្មដ៏អាថ៌កំបាំងលើនារីរូបស្រស់ ដែលជនសង្ស័យជាអតីតអភិបាលខេត្ត

អ្នកបម្រើផ្ទាល់របស់អ្នកស្រី ចេវ សុវឌ្ឍនា ដែលមានឈ្មោះ ចាន់ រី និង ជឹម វុធ ជាប្ដីប្រពន្ធនឹងគ្នា បានរៀបរាប់ចម្លើយសារភាពប្រាប់សមត្ថកិច្ចពីរឿងពិតចំពោះករណីឃាតកម្មលើមេម៉ាយរូបស្រស់ថា ដំបូងឡើយ គឺលោក ឡាយ វណ្ណៈ ដែលជាអតីតអភិបាលខេត្តតាកែវ បានឲ្យខ្លួនទៅបម្រើនៅផ្ទះរបស់អ្នកស្រី ចេវ សុវឌ្ឍនា ដែលជាប្រពន្ធចុង កាលពីអំឡុងឆ្នាំ២០១៧។ ទាំង២នាក់ប្ដីប្រពន្ធ បានធ្វើការងារបម្រើអ្នកស្រី ចេវ សុវឌ្ឍនា តាមការបញ្ជារបស់លោក ឡាយ វណ្ណៈ រហូតដល់ថ្ងៃកើតហេតុ។

នៅថ្ងៃទី២៥ ខែមករា ឆ្នាំ២០១៨ ពោលគឺមុនពេលឃាតកម្មកើតឡើងមួយថ្ងៃ អ្នកបម្រើបានរៀបរាប់ថាឃើញលោក ឡាយ វណ្ណៈ ជិះរថយន្តទំនើបមួយគ្រឿងម៉ាកឡង់គ្រីស្ស័រ ដោយមានអ្នកបើករថយន្តឈ្មោះ ម៉ៃ។ ឈ្មោះ ឡាយ វណ្ណៈ បានទៅអង្គុយជជែកលេងជាមួយនារីរងគ្រោះឈ្មោះ ចេវ សុវឌ្ឍនា ហើយបានមួយសន្ទុះក៏ស្លាប់តែកើតជម្លោះប្រកែកគ្នា ពីរឿងលោក ឡាយ វណ្ណៈ មាន ស្រីក្រៅផ្សេងទៀត។

បន្ទាប់មក នៅថ្ងៃទី២៦ ខែមករា ឆ្នាំ២០១៨ អ្នកស្រី ចេវ សុវឌ្ឍនា បានឲ្យខ្លួន និងប្ដីរៀបចំឥវ៉ាន់ ឡើងមកភ្នំពេញ ដោយមិនដឹងថាមានរឿងអ្វីច្បាស់ ហើយប្រហែលមកពីការឈ្លោះប្រកែកគ្នានោះ។ ពេលដល់ភ្នំពេញនៅវេលាថ្ងៃត្រង់ ស្រាប់តែលោក ឡាយ វណ្ណៈ បានទូរសព្ទហៅពួកគាត់ឲ្យត្រលប់ទៅតាកែវវិញ ដោយធ្វើដំណើរតាមរថយន្តរបស់អ្នកស្រី ចេវ សុវឌ្ឍនា ដែលអ្នកស្រីជាអ្នកបើកដោយផ្ទាល់តែម្ដង។

អ្នកបម្រើទាំង ២នាក់ប្ដីប្រពន្ធ បានរៀបរាប់ទៀតថា ពេលទៅដល់ផ្ទះនៅថ្ងៃដដែល ជនរងគ្រោះ បានប្រាប់ឲ្យខ្លួនរៀបចំបាយទឹកជាធម្មតា។ លុះដល់ម៉ោង ៦ល្ងាច ក៏ឃើញលោក ឡាយ វណ្ណៈ និងលោក ឡាយ ណារិទ្ធ មានអ្នកបើកឈ្មោះម៉ៃ បានទៅដល់ផ្ទះកើតហេតុដែរ។ លោក ឡាយ វណ្ណៈ និងលោក ឡាយ ណារិទ្ធ បានឡើងទៅបន្ទប់ជាន់ទី១ ជាបន្ទប់ដេករបស់អ្នកស្រី ចេវ សុវឌ្ឍនា។ ចំណែកអ្នកបើករថយន្ត នៅអង្គុយលេងខាងក្រោម ជាមួយអ្នកបម្រើប្រុស។

ស្រាប់តែកន្លះម៉ោងក្រោយមក លោក ឡាយ វណ្ណៈ និងលោក ឡាយ ណារិទ្ធ បានចុះមកក្រោមវិញ ហើយនិយាយថា អាវឌ្ឍនា ងាប់ហើយ ពួកឯងចាត់ចែងយកវាទៅចងក នៅក្បែរបន្ទប់ទៅ។ បើប៉ូលិសសួរ ឲ្យប្រាប់ថា វាចងក សម្លាប់ខ្លួន។ បន្ទាប់មក ពីរនាក់បងប្អូននោះ ក៏ចេញទៅវិញបាត់ ហើយប្ដីប្រពន្ធជាអ្នកបម្រើ ព្រមទាំងអ្នកបើករថយន្តឈ្មោះ ម៉ៃ បានឡើងទៅមើលក្នុងបន្ទប់ ស្រាប់តែឃើញអ្នកស្រី ចេវ សុវឌ្ឍនា ដេកស្លាប់ផ្ងារលើគ្រែបាត់ទៅហើយ។

ភ្លាមៗនោះ ប្ដីប្រពន្ធជាអ្នកបម្រើ ព្រមទាំងអ្នកបើករថយន្ត បានរៀបចំឆាកបន្លំភ្នែក ដោយលើកអ្នកស្រី ចេវ សុវឌ្ឍនា ទៅចងក នៅបង្អួចនៃបន្ទប់ដដែល ហើយរៀបចំសកម្មភាពដូចឃើញក្នុងរូបភាពពេលចងក។ ពេលរៀបចំរួចស្រាច់បាត់ ឈ្មោះ ម៉ៃ បានគេចចេញទៅបាត់។ ចំណែកអ្នកបម្រើ បានហៅទូរសព្ទទៅប្រាប់សាច់ញាតិថា អ្នកស្រី ចេវ សុវឌ្ឍនា ចងកសម្លាប់ខ្លួន ព្រមទាំងរាយការណ៍ទៅប្រាប់សមត្ថកិច្ចមូលដ្ឋានដា មានមនុស្សចងកសម្លាប់ខ្លួនក្នុងផ្ទះ។

ខាងលើនេះ ជារៀបរាប់របស់ជនសង្ស័យ ដែលឃាត់ខ្លួនដំបូង ជាមួយលោក ឡាយ ណារិទ្ធ ជាស្នងការរងខេត្តតាកែវ និងជាបងប្រុសបង្កើតរបស់លោក ឡាយ វណ្ណៈ ដែលជាប់សង្ស័យថាជាឃាតក និងត្រូវសមត្ថកិច្ចឃាត់ខ្លួនតាមដីកា កាលពីម្សិលមិញ។ យ៉ាងនេះក្ដី មុនពេលឃាត់ខ្លួន លោក ឡាយ វណ្ណៈ នៅតែបង្ហោះសារប្រកែកថា មិនបានធ្វើសកម្មភាពសម្លាប់អ្នកស្រី ចេវ សុវឌ្ឍនា ហើយនាងចងកធ្វើអត្តឃាត ដោយសារឈឺចាប់នឹងខ្លួនសុំបែក។

អតីតអភិបាលខេត្តតាកែវ ឡាយ វណ្ណៈ ត្រូវបានកម្លាំងមានសមត្ថកិច្ចតាមរយៈរថយន្តសេរីទំនើបជាច្រើនគ្រឿង ធ្វើការឃាត់ខ្លួននៅរសៀលថ្ងៃទី១ ខែមេសាម្សិលមិញ ក្នុងចម្ងាយប្រមាណ ១៥០ម៉ែត្រ ពីកន្លែងប្រារព្ធពិធីផ្ទេរប្រធានបក្សក្នុងខេត្តតាកែវ។ សមត្ថកិច្ចដែលធ្វើដំណើរតាមរថយន្ត ៤ ទៅ ៥រថយន្ត បានឃាត់រថយន្តលោក ឡាយ វណ្ណៈ រួមជាមួយអង្គរក្ស និងប្រគល់ដីកា រួចឃាត់ខ្លួននាំមករាជធានីភ្នំពេញតែម្ដង។ មុនឃាត់ខ្លួនបន្តិច លោក ឡាយ វណ្ណៈ នៅតែបង្ហោះសារជាអំណះអំណាងថា អ្នកនាង ចេវ សុវឌ្ឍនា ពិតជាធ្វើអត្តឃាតព្រោះរឿងស្នេហា មិនមែនជាករណីឃាតកម្មនោះទេ។

មុនពេលឃាត់ខ្លួនបន្តិច លោក ឡាយ វណ្ណៈ បានបង្ហោះរូបអ្នកនាង ចេវ សុវឌ្ឍនា សម្រាកក្នុងមន្ទីរពេទ្យ ហើយបញ្ជាក់ថា តាមពិតទៅ អ្នកនាង ចេវ សុវឌ្ឍនា ធ្លាប់ប៉ុនប៉ងធ្វើអត្តឃាតជាច្រើនដងរួចមកហើយ។ នៅលើកទី១ ថ្ងៃទី១២ ខែវិច្ឆិកា ឆ្នាំ២០១៦ នាងបានខូចចិត្តលេបថ្នាំសម្លាប់ខ្លួន ហើយត្រូវបានមិត្តភ័ក្ដិបញ្ជូនមកព្យាបាលនៅមន្ទីរពេទ្យកាល់ម៉ែត្រ សង្គ្រោះបន្ទាន់ទាន់ពេលវេលា។ ក្រោយមកទៀត រាល់ពេលអ្នកនាង ចេវ សុវឌ្ឍនា ខឹងម្ដងៗ តែងតែចង់ធ្វើអត្តឃាត ប៉ុន្តែចេះតែមានអ្នកឃាត់ទាន់
មុនពេលចាប់ខ្លួនមួយថ្ងៃ លោក ឡាយ វណ្ណៈ ក៏បានបង្ហោះសារមួយទាំងយប់ ដោយរៀបរាប់ថាខ្លួនពិតជាបានទាក់ទងជាមួយអ្នក ចេវ សុវឌ្ឍនា មែន ហើយទាក់ទងបានជាងមួយឆ្នាំ ក៏សុំបែកគ្នាវិញ។ មូលហេតុនេះហើយ ធ្វើឲ្យនារីរូបស្រស់ ចេវ សុវឌ្ឍនា ខូចចិត្ត រហូតធ្វើអត្តឃាតដោយចងកសម្លាប់ខ្លួនក្នុងផ្ទះជួល។ លោកបានអះអាងថា លោកមិនបានបញ្ជាឲ្យគេសម្លាប់នារីរូបស្រស់ដែលជាអតីតគូកំណាន់ចិត្តនោះទេ ហើយបងប្រុសលោកជាស្នងការរងខេត្ត ក៏មិនមានពាក់ព័ន្ធអ្វីដែរ។

ចំពោះសារដែលលោក ឡាយ វណ្ណៈ បានសរសេរលើបណ្ដាញសង្គមម្សិលមិញគឺមានទាំងស្រុងដូចខាងក្រោម៖

«ជូនចំពោះជនរួមជាតិទូទាំងប្រទេស!, ពិសេសប្រជាពលរដ្ឋខេត្តតាកែវ ជាទីគោរពស្រឡាញ់របស់ខ្ញុំ!
+ខ្ញុំសូមបញ្ជាក់អះអាងថា រូបខ្ញុំនិងប្អូនស្រី ចេវ សុវឌ្ឍនាមានទំនាក់ទំនងស្នេហា ស្រឡាញ់គ្នាជាមួយគាត់ពិតប្រាកដមែនក្នុងរយៈពេលជាង ១ឆ្នាំកន្លងមកនេះ! ក្រោយមកខ្ញុំបានសុំកាត់ផ្តាច់ទំនាក់ទំនងជាមួយគាត់ ដែលធ្វេីឲ្យគាត់ខឹងសម្បានឹងខ្ញុំរហូតដល់គាត់គិតខ្លីធ្វេីអត្តឃាដខ្លួនឯង! នេះជារឿងពិត! អ្វីដែលខ្ញុំធ្វេីខុសឆ្គង ខ្ញុំហ៊ានទទួល! ខ្ញុំសុំទោសចំពោះបងប្អូនប្រជាពលរដ្ឋទាំងអស់ ពិសេសបងប្អូនប្រជាពលរដ្ឋខេត្តតាកែវទាំងមូល។

+ប៉ុន្តែខ្ញុំសូមបដិសេដទាំងស្រុងនូវរាល់ការចោទប្រកាន់ដែលថា រូបខ្ញុំនិងបងប្រុសខ្ញុំ បានសម្លាប់ប្អូនស្រី ចេវ សុវឌ្ឍនា!។ ខ្ញុំនិងបងប្រុសខ្ញុំពុំមានចិត្តបាប សាហាវព្រៃផ្សៃសម្លាប់គាត់ទេ!។ សូមបងប្អូនពិចារណាមេីលចុះថា បេីខ្ញុំនិងបងប្រុសខ្ញុំ បានសម្លាប់ប្អូនស្រី ចេវ សុវឌ្ឍនាមែននោះ ម្លេះក្រោយពីគេដកតំណែងខ្ញុំចេញពីអភិបាលខេត្ត ហើយក្រសួងមហាផ្ទៃបេីកការស៊ើបអង្កេតនោះ ខ្ញុំនិងបងប្រុសខ្ញុំរត់ចេញទៅក្រៅប្រទេសសុំសិទ្ធិជ្រកកោននយោបាយពីស្ថានទូតបរទេសបាត់ទៅហើយ។

+ខ្ញុំនៅទីនេះ មិនរត់ចោលគណបក្សប្រជាជនកម្ពុជា និងប្រទេសជាតិរបស់ខ្ញុំទេ!។ ខ្ញុំជឿជាក់លេីប្រព័ន្ធច្បាប់ និងតុលាការរបស់ប្រទេសយើង ថានឹងផ្តល់យុត្តិធម៌ដល់រូបខ្ញុំ និងបងប្រុសខ្ញុំ និងមន្ត្រីដ៏ទៃទៀតដែលរងការចោទប្រកាន់!។ ស្អែកនេះ ខ្ញុំនៅខេត្តតាកែវដើម្បីចូលរួមពិធីផ្ទេរមុខតំណែងប្រធានគណៈកម្មាធិការគណបក្សប្រជាប្រជាជនខេត្តតាកែវពីខ្ញុំ ឲ្យទៅឯកឧត្តម អ៊ូច ភា ដែលជាអភិបាលថ្មីខេត្តតាកែវយេីង ក្រោមអធិបតីភាពឯកឧត្តមឧបនាយករដ្ឋមន្ត្រីប្រចាំការ ប៊ិន ឈិន!

+ពេលខ្ញុំនៅធ្វេីជាអភិបាលខេត្តតាកែវ ខ្ញុំបានដោះស្រាយរកយុត្តិធម៌រាប់មិនអស់ករណីជូនប្រជាពលរដ្ឋរបស់ខ្ញុំ! ខ្ញុំក៏សង្ឃឹមជឿជាក់ថា យុត្តិធម៌នឹងមានសម្រាប់រូបខ្ញុំ និងបងប្រុសខ្ញុំ ឡាយ ណារិទ្ធ!។ សូមបងប្អូនប្រជាពលរដ្ឋទាំងអស់ ពិសេសបងប្អូនប្រជាពលរដ្ឋខេត្តតាកែវ ជឿជាក់ចុះថាខ្ញុំ ឡាយ វណ្ណៈ មិនរត់ចោលបងប្អូនទេ!

ដោយក្តីគោរពស្រឡាញ់ពីខ្ញុំ!»

គួរបញ្ជាក់ថា កាលពីថ្ងៃទី២៦ ខែមករា ពោលគឺជាង ២ខែមុន មានករណីនារីមេម៉ាយរូបស្រស់ម្នាក់ចងកសម្លាប់ខ្លួនដ៏ភ្ញាក់ផ្អើលមួយ នៅក្រុងដូនកែវ ខេត្តតាកែវ ដែលសមត្ថកិច្ចដាក់ការសង្ស័យភ្លាមៗថាបណ្ដាលមកពីវិបត្តិស្នេហា។ ប៉ុន្តែបន្ទាប់ពីស្រាវជ្រាវអស់មួយរយៈ ទើបឈានដល់ការបំបែកសំណុំរឿងដ៏កក្រើក ហើយមនុស្សជាច្រើននាក់បានជាប់សង្ស័យថាពាក់ព័ន្ធនឹងករណីឃាតកម្មលើនារីរូបនោះ។ ក្នុងចំណោមនោះ មានមនុស្ស ៨នាក់ ត្រូវបានកោះហៅមកបំភ្លឺរហូតធ្លាយរឿងពិត ថាជាករណីឃាតកម្ម ហើយបងប្រុសអតីតអភិបាលខេត្តតាកែវ ដែលជាស្នងការរងខេត្តតាកែវ ក៏មានជាប់ពាក់ព័ន្ធដែរ។

រឿងក្ដីដ៏អាថ៌កំបាំងនេះ បានកើតឡើងកាលពីថ្ងៃទី២៦ ខែមករា ឆ្នាំ២០១៨ កន្លងទៅ។ ពេលនោះ អ្នកស្រី ចេវ សុវឌ្ឍនា ដែលមានកូន ៣នាក់ ត្រូវបានគេប្រទះឃើញ ស្លាប់ក្នុងសភាពដូចជាចងកសម្លាប់ខ្លួន នៅក្នុងផ្ទះជួលដ៏ធំមួយ ក្នុងភូមិផ្សារតាកោរ សង្កាត់រកាក្នុង ក្រុងដូនកែវ ខេត្តតាកែវ។ ការពិនិត្យភ្លាមៗ សមត្ថកិច្ចបានដាក់ការសង្ស័យថា វិបត្តិស្នេហា បានធ្វើឲ្យអ្នកមេម៉ាយរូបស្រស់នេះ ធ្វើការចងកបញ្ចប់ជីវិតខ្លួនឯង។

មហាជនជាច្រើន បានសម្ដែងមន្ទិលសង្ស័យ ហេតុអ្វីបានជាសមត្ថកិច្ចធ្វើការសន្និដ្ឋានលឿនយ៉ាងនេះ ហើយបានបញ្ចប់សំណុំរឿងស្ងាត់មួយរយៈ ពោលគឺគ្មានដំណឹងជាង ២ខែមកហើយ។ ប៉ុន្តែប្រភពមួយចំនួន បានអះអាងថា តាមពិតសមត្ថកិច្ចបានបង្វែងដាន ដោយធ្វើការសន្និដ្ឋានភ្លាមៗ ដើម្បីឲ្យជនសង្ស័យប្រហែសខ្លួន។ រឿងក្ដីនេះ ត្រូវអាជ្ញាធរចាត់ទុកថា ស្ថិតក្នុងវាំងននខ្មៅ ដោយភាគរយខ្ពស់បំផុត ហើយមិនមែនជាការចងកសម្លាប់ខ្លួនឡើយ។

ក្រោយមក នគរបាលព្រហ្មទណ្ឌ បានកោះហៅនគរបាលចំនួន ៨នាក់បន្តបន្ទាប់ ដែលមានទាំងលោក ឡាយ ណារិទ្ធ ជាស្នងការរងខេត្តតាកែវ និងជាបងប្រុសរបស់អតីតអភិបាលខេត្តតាកែវ ឡាយ វណ្ណៈ ផង។ ការសាកសួររយៈពេល ២ថ្ងៃដោយកម្លាំងជំនាញរបស់ក្រសួងមហាផ្ទៃ បានឈានទៅដល់ការបំបែកសំណុំរឿងដ៏កក្រើកនេះ ហើយជនសង្ស័យដែលជាប់ពាក់ព័ន្ធ បានសារភាពថា ជាករណីឃាតកម្មប្រាកដមែន មិនមែនជាការចងកសម្លាប់ខ្លួននោះទេ។

ជនសង្ស័យទាំង ៨នាក់ ដែលត្រូវបានកោះហៅមកបំភ្លឺ មានលោក ឡាយ ណារិទ្ធ ដែលជាស្នងការរងនគរបាលខេត្តតាកែវ, នគរបាលបច្ចេកទេស និងនគរបាលព្រហ្មទណ្ឌមួយចំនួននៃក្រុងដូនកែវ។ បើទោះបីជនសង្ស័យដែលជាប់ពាក់ព័ន្ធ បានសារភាពថាជាការធ្វើឃាតក្ដី ព័ត៌មានលម្អិតមិនត្រូវបានទម្លាយចេញមកឡើយ ដោយបន្តតាមនីតិវិធីតុលាការ ដើម្បីស៊ើបបន្តសិន។ ចំណែកមេខ្លោងនៅពីក្រោយអំពើឃាតកម្មដ៏សាហាវនេះ ក៏មិនទាន់បង្ហាញនៅឡើយដែរ។

ការស៊ើបសួរដោយកម្លាំងជំនាញ បានរកឃើញជនសង្ស័យ ៥នាក់ ក្នុងចំណោម ៨នាក់ ហើយត្រូវបញ្ជូនទៅសាលាដំបូងរាជធានីភ្នំពេញ ដើម្បីបន្តនីតិវិធី កាលពីល្ងាចមិញនេះ។ បន្ទាប់មក ជនសង្ស័យទាំង ៥នាក់ ដែលមានទាំងស្នងការរងខេត្តតាកែវ ត្រូវបានបញ្ជូនទៅរក្សាទុកនៅក្រសួងមហាផ្ទៃវិញ ដើម្បីរង់ចាំនីតិវិធីបន្តនៅថ្ងៃស្អែក ក្រោយឃាត់ខ្លួនមនុស្សពាក់ព័ន្ធជាច្រើន ដែលសុទ្ធតែអាចជាអ្នកនៅពីក្រោយអំពើឃាតកម្មនេះ។

បើតាមកម្លាំងមានសមត្ថកិច្ច បានឲ្យដឹងថា ជនសង្ស័យមួយចំនួនទៀតដូចជាឈ្មោះ ចាន់ រី ភេទស្រី និងប្ដីឈ្មោះ ជឹម វុធ ជាអ្នកបំរើនៅផ្ទះអ្នកនាង ចេវ វឌ្ឍនា និងឈ្មោះ មេន សម័យ ជាអ្នកបើកឡានឲ្យលោក ឡាយ វណ្ណៈ ព្រមទាំងឈ្មោះ តាក់ រតនា ជាអ្នកបើកលានឲ្យលោក ឡាយ ណារិទ្ធ គឺជនទាំងនេះត្រូវចោទប្រកាន់ពីបទលាក់បាំងបទល្មើស មិនព្រមរាយការណ៍ឲ្យសមត្ថកិច្ច បន្ទាប់ពីមានករណីឃាតកម្មកើតឡើង។

អ្វីដែលគួរចាប់អារម្មណ៍គឺ នៅថ្ងៃកើតហេតុ សមត្ថកិច្ចបានប្រទះឃើញសំបុត្រមួយច្បាប់ ដែលមិនដឹងថាជនរងគ្រោះសរសេរផ្ញើទៅណា ឬក៏បន្សល់ទុកព្រោះដឹងថាខ្លួនត្រូវស្លាប់នោះទេ។ យ៉ាងនេះក្ដី អត្ថន័យនៅក្នុងសំបុត្រ មិនបានបញ្ជាក់ថា នាងនឹងធ្វើអត្តឃាតឡើយ គ្រាន់តែរៀបរាប់ពីភាពឈឺចាប់ប៉ុណ្ណោះ។ ក្នុងសំបុត្រ មានអត្ថន័យទាំងស្រុងថា៖

«ជីវិតស្រីម្នាក់នេះ ជ្រើសរើសយកបង មិនប្រាថ្នាអ្វីក្រៅពីក្តីស្រឡាញ់ម្យ៉ាងគត់ ។ លះបង់គ្រប់យ៉ាង ព្រោះតែថា ស្រឡាញ់អូនជាប្រពន្ធទី២ប៉ុណ្ណោះ ។ អូនខាំមាត់សង្កត់ចិត្ត ទោះជាគេមើលងាយគ្រប់គ្នា ជេរដៀលគ្រួសារក៏ដោយ សុខចិត្តធ្វើគ្រប់យ៉ាងឲ្យតែបាននៅជិតបង ។ តែអ្វីដែលអូនជ្រើសរើសរហូតមានតែទឹកភ្នែក ការជេរប្រចោរ វាយដំយកឈ្នះចាញ់ ខុសពីអ្វីដែលបានសន្យា កាលគ្រាដំបូង ។

ព្រោះតែការសន្យា ទើបធ្វើឲ្យអូនស្រលាញ់ ហើយលះបង់គ្រប់យ៉ាងធ្វើជាប្រពន្ធទី២ ដែលសង្គមមិនទទួលស្គាល់ ។ គេមើលងាយយ៉ាងណា ក៏ខាំមាត់សង្កត់ចិត្ត ព្រោះតែស្រឡាញ់ មុនថ្ងៃប្រែក្លាយ តែមកដល់ពេលនេះ ទើបអូនដឹងថា បងយកអូនជាស្ត្រីលេងសើច បងដឹងទេថា អូនឈឺចាប់ខ្លាំងណាស់ ! គ្មាននរណាអាចឈរមើលប្តីជាទីស្រឡាញ់ ក្បត់ហើយស្រឡាញ់អ្នកផ្សេង ក្បត់សន្យានោះទេ ។

ដឹងទេថា អូនឈឺចាប់ណាស់ ! ហើយមិនចង់រៀបរាប់អ្វីច្រើនជាងនេះ អូនដឹងត្រឹមថា បងស្រលាញ់គ្រួសារបង ជាងអ្វីដែលអូនសុំត្រឹមជាមនុស្សទី២ សម្រាប់បងៗលេងសើច… ។ ស្រីគ្រប់គ្នា មិនខ្វល់ពីការឈឺចាប់ ស្រីម្នាក់លះបង់ ដើម្បីបងគ្រប់យ៉ាង មិនចង់បានអ្វីនោះទេ ។ គ្រប់យ៉ាងព្រោះតែស្រឡាញ់ ! ការឈឺចាប់នៅពេលនេះព្រោះតែស្រឡាញ់តែម្យ៉ាងគត់ ។ ខ្ញុំនឹងដើរចេញពីជីវិតបង ដូចដែលបងចង់បាន ទោះជាខ្ញុំត្រូវឈឺចាប់យ៉ាងណាក៏ដោយ ឲ្យតែជាសេចក្តីសុខបងគ្រប់យ៉ាង ព្រោះតែស្រឡាញ់ និងការឈឺចាប់ដែលបងផ្តល់ឲ្យ ។

អរគុណគ្រប់យ៉ាងព្រោះតែចង់បានក្តីសុខ តែផ្ទុយទៅវិញមានតែទឹកភ្នែក ប្តីមិនស្រឡាញ់ គ្រប់យ៉ាងមានតែស្រីក្បត់ ថោកទាប មិនស្មោះត្រង់តែប៉ុណ្ណោះ ។ ខ្ញុំមិនស្តាយក្រោយទេ ដែលជ្រើសរើសយកបង តែសូមបងគិតឡើងវិញថា បងបានធ្វើទង្វើអ្វីខ្លះមកលើស្រីម្នាក់នេះ តាំងពីដំបូងមកដល់ឥឡូវ ទោះជាពេលនេះ បងអស់ក្តីស្រឡាញ់ បងមានតែភាពធុញទ្រាន់យ៉ាងណា តែអូននៅមិនភ្លេចសន្យាកាលគ្រា ដើម។ ទោះជាយ៉ាងណានៅតែស្រឡាញ់ លុយមិនសំខាន់ទេ សម្រាប់មនុស្សស្រីម្នាក់នេះ សម្តីបងគ្រប់យ៉ាង ពិតជាធ្វើឲ្យអូនឈឺចាប់ គ្មានអ្វីនឹងនិយាយតបបាននោះទេ ។ មនុស្សជុំវិញខ្លួនមើលងាយខ្ញុំ ធ្វើបាបខ្ញុំយ៉ាងណា…បងមិនឲ្យតម្លៃ និងមើលងាយខ្ញុំ ដោយនិយាយធ្វើបាបចិត្តខ្ញុំ ។»

Hot News Todays

ធ្លាយរឿងកាន់តែច្បាស់ អ្នកបម្រើរៀបរាប់គ្មានសល់ (មានវិដេអូ) ករណីឃាតកម្មដ៏អាថ៌កំបាំងលើនារីរូបស្រស់ ដែលជនសង្ស័យជាអតីតអភិបាលខេត្ត

No comments:

Post a Comment

អត្ថបទពេញនិយម