មានមតិខ្លះបានលើកឡើងថាអ្នក IT ជាមនុស្សដែលស្មោះនឹងស្នេហាជាទីបំផុត។ វាអាចជាការលើកឡើងដ៏ត្រឹមត្រូវមួយ ព្រោះថាបុគ្គលបច្ចេកវិទ្យាល្បីៗភាគច្រើននាពេលបច្ចុប្បន្នមានគូកំណាន់តែម្នាក់ប៉ុណ្ណោះ ត្បិតថាពួកគេមានទ្រព្យសម្បត្តិហូរហៀរក្ដី។
១. លោក Bill Gates
លោក Bill Gates អ្នកបង្កើតក្រុមហ៊ុន Microsoft បានរៀបការជាមួយលោកស្រី Melinda French នាឆ្នាំ ១៩៩៤ ពេលដែលខាងប្រុសមានវ័យ ៣៨ ឆ្នាំ និងខាងស្រីមានវ័យ ២៩ ឆ្នាំ។ ចំណងអាពាហ៍ពិពាហ៍រយៈពេលជាង ២០ ឆ្នាំរបស់គូស្នេហ៍មួយគូនេះបានបន្សល់ទុកនូវកូនប្រុសស្រីចំនួន ៣ នាក់។
២. លោក Mark Zuckerberg
លោក Mark Zuckerberg បានជួបនឹងលោកស្រី Priscilla Chan ដែលជាភរិយារបស់ខ្លួនជាលើកដំបូងនៅក្នុងពិធីជប់លៀងមួយ អំឡុងពេលរៀននៅសាកលវិទ្យាល័យ Harvard។ អ្នកទាំងពីរបានចាប់ផ្ដើមទាក់ទងគ្នានៅឆ្នាំ ២០០៣ និងបានរៀបការនៅខែឧសភា ឆ្នាំ ២០១២ ដោយបច្ចុប្បន្ននេះមានកូនចំនួន ២។
៣. លោក Jack Ma
ត្បិតថាមិនបានសិក្សាជំនាញបច្ចេកវិទ្យាអ្វីមែនពិត ប៉ុន្តែលោក Jack Ma ជាបុគ្គលម្នាក់ដែលស្រឡាញ់ និងចូលចិត្តការសរសេរកូដ។ ម្ចាស់ក្រុមហ៊ុន Alibaba រូបនេះបានរៀបការជាមួយនឹងលោកស្រី Zhang Ying ដែលជាសិស្សរួមសាលា ក្រោមបញ្ចប់ការសិក្សានៅចុងសតវត្សឆ្នាំ ១៩៨០។ បច្ចុប្បន្ននេះមានកូនប្រុស ស្រីចំនួនពីរនាក់។
៤. លោក Larry Page
សហស្ថាបនិកក្រុមហ៊ុន Google នេះបានចងភ្ជាប់ចំណងអាពាហ៍ពិពាហ៍ជាមួយនឹង Lucinda Southworth នៅឆ្នាំ ២០០៧ ដោយមានកូនៗចំនួនពីររូបកើតនៅឆ្នាំ ២០០៩ និង ឆ្នាំ ២០១១។
៥. លោក Jeff Bezos
បច្ចុប្បន្នស្ថាបនិកក្រុមហ៊ុន Amazon រូបនេះជាបុគ្គលមានជាងគេលំដាប់ទីមួយក្នុងលោកដែលមានទ្រព្យសម្បត្តិសរុប ១១៥,៧ ពាន់លានដុល្លារ។ លោកបានរៀបការជាមួយលោកស្រី MacKenzie Bezos នៅឆ្នាំ ១៩៩៣ និងមានកូនៗចំនួន ៤ រូបជាចំណងដៃ។
៦. លោក Satya Nadella
នៅឆ្នាំ ១៩៩២ នាយកប្រតិបត្តិបច្ចុប្បន្នរបស់ក្រុមហ៊ុន Microsoft រូបនេះ បានរៀបមង្គលការជាមួយនឹងលោកស្រី Anupama ដែលកូនស្រីមិត្តភ័ក្ដិឪពុករបស់ខ្លួន។ បច្ចុប្បន្នប្ដីប្រពន្ធមួយគូនេះមានកូនៗចំនួន ៣ នាក់ ប្រុស ១ ស្រី ២។
៧. លោក Sundar Pichai
នាយកប្រតិបត្តិក្រុមហ៊ុន Google រូបនេះមានភរិយាឈ្មោះ Anjali Pichai។ មិនមានព័ត៌មានអំពីកាលបរិច្ឆេទរៀបការរបស់គូស្នេហ៍មួយគូនេះឡើយ ប៉ុន្តែគេដឹងថាពួកគេចាប់ផ្ដើមស្រឡាញ់គ្នាតាំងពីពេលដែលលោក Sundar នៅជានិស្សិតនៃវិទ្យាស្ថានបច្ចេកវិទ្យារបស់ឥណ្ឌា ហើយពួកគេមានកូនចំនួនពីររូប៕
អត្ថបទ៖ សុខហេង
No comments:
Post a Comment