នៅថ្ងៃទី០១ ខែតុលា ឆ្នាំ២០១៨ ខាងមុខនេះ អាជ្ញាធរខេត្តកំពង់ឆ្នាំង នឹងចាប់ផ្តើមបំលាស់ទីផ្ទះបណ្តែតទឹករបស់ជនជាតិវៀតណាម ជិត១ពាន់គ្រួសារ នៅក្នុងក្រុងកំពង់ឆ្នាំង ឲ្យមករស់នៅលើគោកវិញឱ្យអស់ត្រឹមចុងឆ្នាំនេះ។ នេះបើតាមការចុះផ្សាយរបស់វិបសាយក្រសួងព័ត៌មាន កាលពីថ្ងៃទី២៤ ខែកញ្ញា ឆ្នាំ២០១៨។
វិបសាយនេះ បានដកស្រង់សម្តីលោក ស៊ុន សុវណ្ណរិទ្ធ អភិបាលរងខេត្តកំពង់ឆ្នាំង ឱ្យដឹងថា កាលពីថ្ងៃទី២៤ ខែកញ្ញា អាជ្ញាធរខេត្ត បានផ្សព្វផ្សាយសេចក្តីជូនដំណឹងពីផែនការខាងលើនេះ ដល់ប្រជាពលរដ្ឋ ដែលកំពុងរស់នៅលើផ្ទះបណ្តែតទឹកក្នុងទន្លេ ដើម្បីចូលរួមអនុវត្តផែនការ៥ឆ្នាំរបស់ខេត្តឱ្យទទួលបានជោគជ័យ។ ផែនការនេះ គឺត្រូវអនុវត្ត ពីឆ្នាំ២០១៥ ដល់ ២០១៩។
លោកបន្តថា នៅក្នុងផែនការនេះ អាជ្ញាធរខេត្ត បានបង្កើតគណៈកម្មការ ៦ក្រុម គឺក្រុមទី១ ដឹកនាំដោយលោកផ្ទាល់ ធ្វើបំលាស់ទីផ្ទះបណ្តែតទឹក នៅក្នុងក្រុងកំពង់ឆ្នាំង ឱ្យឡើងមករស់នៅលើគោកវិញ ឱ្យអស់នៅចុងឆ្នាំ២០១៨នេះ ។ ចំណែក ៥ក្រុមទៀត គឺមានលោកស្នងការនគរបាលខេត្តជាប្រធាន និងអភិបាលស្រុកពាក់ព័ន្ធ ជាអនុប្រធាន ដោយត្រូវធ្វើការបំលាស់ទីផ្ទះបណ្តែតទឹកទាំងអស់ ដែលមានទាំងវៀតណាម ទាំងខ្មែរ និងទាំងខ្មែរឥស្លាមមានចំនួនជាង ២ពាន់គ្រួសារ នៅតាមស្រុកក្នុងខេត្តកំពង់ឆ្នាំង ឱ្យឡើងមករស់នៅលើគោកទាំងអស់នៅក្នុងឆ្នាំ២០១៩។ ក្នុងនោះ ជាង២ពាន់គ្រួសារ បានផ្តិតមេដៃយល់ព្រមរួចហើយ ហើយអាជ្ញាធរខេត្ត ក៏បានបញ្ជូនមេដៃទាំងនោះ ជូនប្រមុខរាជរដ្ឋាភិបាលរួចហើយដែរ។
ផ្ទះបណ្ដែតទឹករបស់ជនជាតិវៀតណាម ចាម និងខ្មែរ នៅក្នុងសង្កាត់ផ្សារឆ្នាំង ក្រុងកំពង់ឆ្នាំង ខេត្តកំពង់ឆ្នាំង ក្នុងឆ្នាំ២០១៥។ រូបថត៖ RFA
បើតាមលោកអភិបាលរងខេត្ត នៅក្រុងកំពង់ឆ្នាំងនេះ មានផ្ទះបណ្ដែតទឹករបស់ជនជាតិវៀតណាមចំនួន ៩៩៦គ្រួសារ ដែលត្រូវបម្លាស់ទីឱ្យឡើងមករស់នៅលើគោក លើដីទំហំជាង ៤០ហិកតា ក្នុងឃុំស្វាយជ្រុំ ស្រុករលាប្អៀរ។ អាជ្ញាធរខេត្ត បានធ្វើគម្រោង សុំអនុប្រយោគពីរាជរដ្ឋាភិបាលសុំកាត់ដីនេះ ចេញពីតំបន់ដីលិចទឹក។
គួររំលឹកដែរថា កាលពីព្រឹកថ្ងៃទី២៧កញ្ញាម្សិលមិញនេះ អាជ្ញាធរខេត្តកំពង់ឆ្នាំង បានធ្វើពិធីក្រុងពាលីសុំសេចក្តីសុខ ខណៈដែលអាជ្ញាធរត្រៀមរៀបចំគម្រោងធ្វើការបំលាស់ទីផ្ទះបណ្តែតទឹកនេះ។
លោក ឈួរ ច័ន្ទឌឿន អភិបាលខេត្តកំពង់ឆ្នាំង បានថ្លែងក្នុងពិធីនេះថា គម្រោងបំលាស់ទីផ្ទះបណ្តែតទឹកនេះ ធ្វើឡើងដើម្បីធានាបាននូវបរិស្ថាន និងសោភ័ណភាពនៅតាមដងទន្លេនៃភូមិសាស្រ្តខេត្តកំពង់ឆ្នាំង៕
អត្ថបទ៖ សំភី
No comments:
Post a Comment