ខ្សែបម្រើប្រយុទ្ធវ័យក្មេង Kylian Mbappe ធ្វើបានយ៉ាងល្អឥតខ្ចោះជួយក្រុមបាល់ទាត់ជម្រើសជាតិមាន់គក់បារាំងបានឡើងទៅកាន់វគ្គ៨ក្រុមចុងក្រោយនៃពានបាល់ទាត់ពិភពលោក បន្ទាប់ពីយកឈ្នះក្រុមជម្រើសជាតិអាហ្សង់ទីនដោយលទ្ធផល ៤-៣ ក្នុងវគ្គ១៦ក្រុមចុងក្រោយ។
ក្រុមបារាំងអបអរសាទរពេលរកគ្រាប់បាល់បាន
វាជាការប្រកួតដ៏គួរឲ្យចាប់អារម្មណ៍សម្រាប់អ្នកស្នេហាបាល់ទាត់ទូទាំងពិភពលោករវាងបារាំង និងអាហ្សង់ទីន។ តារាឆ្នើមវ័យក្មេងរបស់បារាំង Kylian Mbappe ជាអ្នកបង្កើតឱកាសស៊ុតពិន័យ១១ម៉ែត្រ បន្ទាប់ពីរូបគេអូសបាល់ពីពាក់កណ្តាលតារាងចូលទៅប្រអប់គ្រោះថ្នាក់ដែលត្រូវបានខ្សែការពារអាហ្សង់ទីនប៉ះទង្គិចដួល។ ភារកិច្ចនេះ ខ្សែប្រយុទ្ធលេខ៧ Griezmann ស៊ុតប៉េណាល់ទីបានសម្រេចនៅនាទី១៣ដើម្បីនាំមុខ ១-០។ គ្រាប់បាល់នេះបានធ្វើក្រុមបារាំង និងអ្នកគាំទ្ររបស់ខ្លួនរំភើបរីករាយមិនស្ទើរទេ។
បន្ទាប់ពីត្រូវគូប្រកួតបើកការនាំមុខ អាហ្សង់ទីនបានព្យាយាមវាយសម្រុក និងបង្កើតឱកាសចូលតំបន់គ្រោះថ្នាក់របស់បារាំង ប៉ុន្តែរបាំងការពារបារាំងរឹងមាំ។ ពេលលេងនៅតំបន់គ្នាគ្មានប្រសិទ្ធភាពបានជំរុញឲ្យ Angel Di Maria ស៊ុតពីចម្ងាយយ៉ាងល្អចូលទីបានសម្រេចដើម្បីតាមស្មើ ១-១ នៅវគ្គទី១។
Mbappe ត្រូវបានខ្សែការពារអាហ្សង់ទីនរារាំង
ចំពោះការប្រកួតនៅវគ្គទី២ អាហ្សង់ទីនជាអ្នកធ្វើឲ្យអ្នកគាំទ្ររបស់ស្រែកកញ្ជ្រៀវសប្បាយរីករាយ បន្ទាប់ពីទទួលបាល់ពិន័យហ្វ្រីឃីក និងសម្រុកជាបន្តបន្ទាប់ផ្តល់ឲ្យកីឡាករ Mercado រកគ្រាប់បាល់បានតាមរយៈការស៊ុតរបស់ Lionel Messi នៅនាទីទី៤៨ ដើម្បីនាំមុខ ២-១ វិញម្តង។
ក្រោយពេលអាហ្សង់ទីននាំមុខ បារាំងបានប្រមូលស្មារតីលេងបានយ៉ាងល្អ ជាពិសេសនៅតំបន់បម្រើប្រយុទ្ធពិតជាធ្វើបានល្អណាស់។ នៅនាទី៥៧ Bavard បានរកគ្រាប់បាល់ជួយបារាំងតាមស្មើ ២-២។ ចាប់ពីនាទី៦០ឡើងទៅបារាំងកាន់តែលេងបានយ៉ាងល្អឥតខ្ចោះក្នុងនោះ Kylian Mbappe ស៊ុតបំប៉ោងសំណាញ់ទីនាំមុខ ៣-២ នៅនាទីទី៦៤ និងនាទីទី៦៨យុវជនឆ្នើមរូបនេះស៊ុតបាន១គ្រាប់ទៀតដើម្បីនាំមុខ ៤-២។ ការព្យាយាមវាយសម្រុកចុងម៉ោងបានធ្វើឲ្យ អាហ្សង់ទីនរកគ្រាប់បាល់បាន១គ្រាប់ទៀតដោយខ្សែប្រយុទ្ធ Sergio Aguero នៅនាទីទី ៩០+។
គ្រាប់បាល់ ៤-៣ នេះរក្សារហូតចប់ការប្រកួតដែលជម្រើសជាតិបារាំងត្រូវបន្តឡើងទៅវគ្គ៨ក្រុមចុងក្រោយ ខណៈអាហ្សង់ទីនត្រូវត្រឡប់ទៅផ្ទះវិញត្រឹមវគ្គនេះហើយ៕
អត្ថបទ៖ ជាន ចាន់រ៉ា
No comments:
Post a Comment