អាជ្ញាធររាជធានីភ្នំពេញ គ្រោងនឹងសាងសង់ចំណតរថយន្តក្រោមដី នៅក្រោមសួនច្បារ មិត្តភាព កម្ពុជា-ថៃ ដែលស្ថិតនៅមុខស្ថានទូតអាមេរិក ខាងលិចវត្តភ្នំ។ គម្រោងសាងសង់ចំណតរថយន្តក្រោមដីនេះ ត្រូវបានប្រកាសក្នុងជំនួបសម្តែងការគួរសម រវាងលោក ឃួង ស្រេង អភិបាលរាជធានីភ្នំពេញ និងលោក ប៉ានីយ៉ារ៉ាក់ ពូលធុប ឯកអគ្គរាជទូតថៃ ប្រចាំកម្ពុជា នាព្រឹកថ្ងៃទី២៨ ខែមិថុនា ឆ្នាំ២០១៨ នៅសាលារាជធានីភ្នំពេញ។
លោក ឃួង ស្រេង (ស្ដាំ) អភិបាលរាជធានីភ្នំពេញ និងលោក ប៉ានីយ៉ារ៉ាក់ ពូលធុប ឯកអគ្គរាជទូតថៃ ប្រចាំកម្ពុជា ក្នុងជំនួបថ្ងៃ២៨ មិថុនានេះ (រូបភាព៖ រដ្ឋបាលរាជធានីភ្នំពេញ)
លោក ឃួង ស្រេង អភិបាលរាជធានីភ្នំពេញ បានលើកឡើងថា ក្រោយការស្ថាបនាចំណតរថយន្តក្រោមដីថ្មីនេះ អាជ្ញាធររាជធានីភ្នំពេញ សហការជាមួយស្ថានទូតថៃ នឹងស្ថាបនាសួនច្បារឡើងវិញ ដោយរក្សាទ្រង់ទ្រាយដើម ហើយមានការមើលថែពីក្រុមអ្នកបច្ចេកទេសមកពីប្រទេសថៃ។
សួនមិត្តភាព កម្ពុជា-ថៃ ក្នុងថ្ងៃសម្ពោធ ៧ កញ្ញា ២០១៧ (រូបភាព៖ ទីភ្នាក់ងារសារព័ត៌មានកម្ពុជា AKP)។ ចំណតរថយន្តក្រោមដី នឹងត្រូវសាងសង់នៅក្រោមសួនច្បារនេះ
លោកអភិបាលរាជធានីភ្នំពេញ បញ្ជាក់ទៀតថា គម្រោងសាងសង់ចំណតរថយន្តក្រោមដី មិនប៉ះពាល់ដល់ដើមឈើ ដែលប្រមុខរាជរដ្ឋាភិបាលកម្ពុជា និងថៃ ដាំរួមគ្នានោះទេ ដោយសារតែដើមឈើទាំងនោះ ស្ថិតនៅលើសួនច្បារប៉ែកខាងលិច រីឯចំណតក្រោមដី នឹងត្រូវធ្វើនៅប៉ែកខាងកើត ទល់មុខស្ថានទូតអាមេរិក ប្រចាំកម្ពុជា។
នាយករដ្ឋមន្រ្ដីថៃ ប្រាយុទ្ធ ច័ន្ទអូចា និងភរិយា ស្រោចទឹកដើមឈើរដែលដាំរួមគ្នាជាមួយប្រមុខរាជរដ្ឋាភិបាលកម្ពុជា ថ្ងៃទី៧ កក្កដា ២០១៧។ គម្រោងចំណតរថយន្តក្រោមដី មិនប៉ះពាល់ដល់ដើមឈើនេះទេ
លោក ប៉ានីយ៉ារ៉ាក់ ពូលធុប ឯកអគ្គរាជទូតថៃ ប្រចាំកម្ពុជា បានបញ្ជាក់ថា ដោយសារតែតម្រូវការជាក់ស្តែងរបស់រាជធានីភ្នំពេញ ដែលខ្វះចំណតរថយន្ត ភាគីថៃមិនមានអ្វីជំទាស់នឹងគម្រោងសាងសង់ចំណតរថយន្តក្រោមដីនោះឡើយ។ លោក បានស្នើឲ្យអ្នកជំនាញ រួមគ្នាសិក្សាឲ្យបានល្អិនល្អន់ ដើម្បីរក្សាបាននូវទ្រង់ទ្រាយដើមរបស់សួនមិត្តភាពកម្ពុជា-ថៃ។
សួនមិត្តភាព កម្ពុជា-ថៃ ត្រូវបានសម្ពោធជាផ្លូវ កាលពីថ្ងៃទី៧ ខែកញ្ញា ឆ្នាំ២០១៧ ដោយមានវត្តមានសម្តេច ហ៊ុន សែន និងនាយករដ្ឋមន្ត្រីថៃ លោក ប្រាយុទ្ធ ច័ន្ទអូឆា។ សួនច្បារនេះ ស្ថិតនៅខាងលិចវត្តភ្នំ មានប្រវែងជាង ៤៥០ ម៉ែត្រ ទទឹង ៣១ម៉ែត្រ លាតសន្ធឹងពីមុខស្ថានទូតអាមេរិក ដល់មុខសាកលវិទ្យាល័យជាតិគ្រប់គ្រង ផ្លូវព្រះមុនីវង្ស ក្នុងសង្កាត់ វត្តភ្នំ ខណ្ឌដូនពេញ រាជធានីភ្នំពេញ។
មេដឹកនាំកម្ពុជា-ថៃ ក្នុងថ្ងៃសម្ពោធសួនមិត្តភាព កម្ពុជា-ថៃ ថ្ងៃ៧ កញ្ញា ២០១៧
សូមបញ្ជាក់ដែរថា អាជ្ញាធររាជធានីភ្នំពេញ ទើបតែសាងសង់រួចរាល់នូវចំណតក្រោមដី ស្ថិតនៅក្រោមសួនច្បារផ្សារចាស់ ដែលនៅមុខស្ថានីយរថភ្លើង ចន្លោះពីអគារខ្ពស់វឌ្ឍនៈ និងអគារកាណាឌីយ៉ា។ ចំណតរថយន្តក្រោមដីនោះ មិនទាន់សម្ពោធបើកឲ្យដំណើរការជាផ្លូវការនៅឡើយទេ៕
អត្ថបទ៖ លីហៀង
No comments:
Post a Comment