ប្រធានាធិបតីសហរដ្ឋអាមេរិក លោក ដូណាល់ ត្រាំ កាលពីថ្ងៃទី១៨ មិថុនាម្សិលមិញ បានគំរាមដំឡើងពន្ធនាំចូលចំនួន ១០% ទៅលើទំនិញចិនបន្ថែមទៀត ដែលមានតម្លៃប្រមាណ ២០០ ពាន់លានដុល្លារ។
លោក ដូណាល់ ត្រាំ ថ្លែងនាពេលកន្លងមក
លោក ត្រាំ បានបញ្ជាក់ថា លោកនឹងចាត់វិធានការថ្មីបន្ថែមទៀតទៅលើការវាយបករបស់ទីក្រុងប៉េកាំង ពាក់ព័ន្ធនឹងការដំឡើងពន្ធនាំចូលរបស់សហរដ្ឋអាមេរិក។
«ចំណាត់ការបន្ថែមទៀត នឹងត្រូវធ្វើឡើង ដើម្បីជំរុញឲ្យចិន ផ្លាស់ប្ដូរទម្លាប់មិនត្រឹមត្រូវរបស់ខ្លួន ដោយបើកទីផ្សារទទួលយកទំនិញរបស់សហរដ្ឋអាមេរិក ព្រមទាំងទទួលយកទំនាក់ទំនងពាណិជ្ជកម្មដែលមានតុល្យការជាងនេះជាមួយសហរដ្ឋអាមេរិក»។ នេះជាការបញ្ជាក់របស់លោកដូណាល់ ត្រាំក្នុងសេចក្ដីថ្លែងការណ៍។
លោក ត្រាំ បានពន្យល់ទៀតថា «ទំនាក់ទំនងពាណិជ្ជកម្មរវាងសហរដ្ឋអាមេរិក និងចិន ត្រូវតែមានភាពស្មើគ្នាជាងនេះ»។ លោក បានបន្ថែមទៀតថា «ខ្ញុំមានទំនាក់ទំនងល្អជាមួយប្រធានាធិបតីចិន លោកស៊ី ជិនភីង។ យើងនឹងបន្តធ្វើការជាមួយគ្នាដើម្បីដោះស្រាយរឿងនេះ។ ប៉ុន្តែសហរដ្ឋអាមេរិក មិនព្រមឲ្យប្រទេសចិន និងប្រទេសផ្សេងទៀត កេញចំណេញលើផ្នែកពាណិជ្ជកម្មជាមួយអាមេរិកបន្តទៀតជាដាច់ខាត។»
លោក ស៊ី ជីងពីង ប្រធានាធិបតីចិន ទទួលស្វាគមន៍លោក ដូណាល់ ត្រាំ ប្រធានាធិបតីអាមេរិក អំឡុងទស្សនកិច្ចនៅក្រុងប៉េកាំង នាពេលកន្លងមក
គួររម្លឹកថា ប្រធានាធិបតីអាមេរិក លោក ដូណាល់ ត្រាំ កាលថ្ងៃទី ១៤ មិថុនាកន្លងទៅ បានសម្រេចយល់ព្រមលើការកំណត់ពន្ធនាំចូល ២៥% លើទំនិញចិន ដែលមានតម្លៃប្រមាណជាង ៥០ពាន់លានដុល្លារ ក្នុងនោះភាគច្រើន ជាផលិតផលបច្ចេកវិទ្យា ដែលមហាយក្សចិន ឈានមុខជាងគេ។
ឆ្លើយតបទៅនឹងការប្រកាសរបស់លោកដូណាល់ ត្រាំ មហាយក្សចិន កាលពីថ្ងៃទី១៥ មិថុនាកន្លងទៅ បានសម្រេចកំណត់ពន្ធបន្ថែមចំនួន ២៥% លើទំនិញ ៦៥៩មុខរបស់សហអាមេរិក ដែលមានទំហំទឹកប្រាក់ ៥០ពាន់លានដុល្លារ ក្នុងនោះ ទំនិញ ៥៤៥មុខ ដែលមានទំហំទឹកប្រាក់ ៣៤ពាន់លានដុល្លារ ជាផលិតផលកសិកម្ម៕
No comments:
Post a Comment