បុរសជនជាតិអង់គ្លេសម្នាក់ដែលមានសាក់អក្សរតៃវ៉ាន់នៅលើថ្ងាស បាននិយាយថា ខ្លួនត្រូវជនជាតិចិនដែលខឹងសម្បារមួយក្រុម វាយធ្វើបាបយ៉ាងព្រៃផ្សៃ កាលពីចុងសប្ដាហ៍កន្លងទៅនេះ នៅក្នុងប្រទេសកម្ពុជា។
ជនរងគ្រោះ ឈ្មោះ Paul Farrell
យោងតាមសារព័ត៌មានតៃវ៉ាន់ Taiwan Observer បានឲ្យដឹងថា ហេតុការណ៍នេះបានកើតឡើងកាលពីយប់ថ្ងៃសៅរ៍ នៅបារមួយកន្លែង ក្នុងក្រុងព្រះសីហនុ ប្រទេសកម្ពុជា។
ខាងក្រោមនេះគឺជាសារពន្យល់នៅលើបណ្ដាញសង្គម Facebook របស់ជនរងគ្រោះឈ្មោះថា Paul Farrell៖
«ខណៈពេលកំពុងសម្រាកវិស្សមកាលនៅប្រទេសកម្ពុជា ជនជាតិចិនមួយក្រុមបានខឹងយ៉ាងខ្លាំង ដោយសារការចាក់សាក់អក្សរតៃវ៉ាន់របស់ខ្ញុំ ហើយក្នុងចំណោម ១០នាក់នោះ បានវាយប្រហារខ្ញុំជាមួយបង្គោលដែក ធ្វើឲ្យខ្ញុំបាក់ធ្មេញមួយចេញមកក្រៅ និងធ្មេញ ២ទៀតលានចេញមកមុខ។ ឥឡូវនេះខ្ញុំមិនអាចបិទមាត់ជិតបានទេ»។
Paul បានបន្តថា «អ្វីដែលធ្វើឲ្យកើតរឿងនេះឡើង គឺនៅពេលខ្ញុំដោះមួកចេញ ហើយចិនម្នាក់ក្នុងចំណោមនោះបានអានសាក់របស់ខ្ញុំ និងស្រែកថា "Taiwan zhong guo”។ ខ្ញុំបានឆ្លើយតបធម្មតាថា "Taiwan Taiwan” ហើយពួកគេក៏បានយកបង្គោលដែកមកវាយខ្ញុំតែម្ដង»។
លោក Paul Farrell មុនពេលកើតហេតុ
បើតាមសារព័ត៌មាន Taiwan News បានរាយការណ៍ថា ជនជាតិចិនទាំងនោះទាមទារឲ្យ Paul ទទួលស្គាល់ថា តៃវ៉ាន់គឺជាផ្នែកមួយនៃប្រទេសចិន។ នៅចុងបញ្ចប់ ដោយសារតែខ្លាចគ្រោះថ្នាក់ដល់ជីវិត Paul ក៏បាននិយាយថា «មែនហើយ អ្នកគិតថាតៃវ៉ាន់គឺជាប្រទេសចិន ខ្ញុំនឹងនិយាយថា តៃវ៉ាន់គឺជាប្រទេសចិន។ ខ្ញុំគ្រាន់តែចង់ចាកចេញប៉ុណ្ណោះ»។
លោក Paul Farrell ក្រោយពេលកើតហេតុ
ភ្ជាប់ជាមួយសារខាងលើ Paul បានបង្ហោះរូបថតប៉ុន្មានសន្លឹក បង្ហាញឲ្យឃើញរូបលោកប្រឡាក់ដោយឈាម និងស្នាមរបួស ខណៈអាវត្រូវរហែកខ្ទេច។
គួរបញ្ជាក់ថា Paul បានរស់នៅឯតៃវ៉ាន់អស់រយៈពេល ១៤ឆ្នាំមកហើយ។ លោកបានរៀបការជាមួយស្ត្រីតៃវ៉ាន់ កាលពី៧ឆ្នាំមុន និងជាម្ចាស់បារមួយកន្លែងនៅទីក្រុង Kaohsiung ទៀតផង៕
No comments:
Post a Comment