ករណីអ្នកភូមិពុលស្លាប់ ចំនួន ១៣នាក់ នៅខេត្តក្រចេះ កាលពីដើមខែឧសភាកន្លងទៅ ត្រូវបានរកឃើញថាមានជាប់ពាក់ព័ន្ធទៅនឹងក្រុមអ្នកជីករ៉ែមាស ដែលកំពុងធ្វើអាជីវកម្មនៅតាមដងព្រែកទេរ។ នេះបើតាមការបញ្ជាក់របស់លោក ចម ប្រសិទ្ធ ទេសរដ្ឋមន្រ្តី រដ្ឋមន្ត្រីក្រសួងឧស្សាហកម្ម និងសិប្បកម្ម នៅថ្ងៃទី១៧ ខែឧសភា ឆ្នាំ២០១៨ នេះ។
លោករដ្ឋមន្រ្ដី បានបន្ថែមថា ក្នុងអំឡុងពេលចុះតាមដានក្រោយផ្ទុះករណីពុលស្លាប់ មន្ត្រីរបស់ក្រសួង បានរកឃើញថា ក្រុមអ្នកជីករ៉ែមាសទាំងនោះ បានប្រើប្រាស់សារធាតុគីមីដែលមានភាពពុលខ្លាំង ដើម្បីលាងសម្អាតមាស។ លោកថា ក្រសួងបានបញ្ជូនសំណាករកឃើញ ទៅកាន់សម្តេចនាយករដ្ឋមន្រ្ដី ហ៊ុន សែន ដើម្បីត្រួតពិនិត្យ មុននឹងចាត់វិធានការណ៍តាមផ្លូវច្បាប់ទៅលើអាជីវកម្មរ៉ែមាសនោះ។
លោក ចម ប្រសិទ្ធ រដ្ឋមន្ត្រីក្រសួងឧស្សាហកម្ម និងសិប្បកម្ម
គួររំលឹកផងដែរថា ករណីពុលនេះ កើតឡើងនៅភូមិចំនួន៤ ក្នុងឃុំកន្ទួត ស្រុកចិត្របុរី ខេត្តក្រចេះ កាលពីថ្ងៃទី៣ ខែឧសភា ឆ្នាំ២០១៨ ដោយអ្នកភូមិជាច្រើន មានរោគសញ្ញា ឈឺពោះ ក្អួតចង្អោរ ឈឺក អស់កម្លាំង ទន់ដៃទន់ជើង វិលមុខ និងថប់ដង្ហើម។ រហូតដល់ថ្ងៃទី៧ ឧសភា ចំនួនអ្នកស្លាប់ដោយសារករណីពុល បានកើនឡើងដល់ ១៣នាក់ និងជាច្រើននាក់ទៀត ត្រូវចូលសម្រាកនៅមន្ទីរពេទ្យ។
ឆ្លើយតបទៅនឹងសភាពការណ៍នោះ ក្រសួងសុខាភិបាលបានដាក់ចេញនូវវិធានការចំនួន ៣ ទី១ បញ្ឈប់ការបិត និងលក់ស្រាសក្នុងមូលដ្ឋាន ទី២ ហាមប្រជាជនក្នុងភូមិ កុំឲ្យប្រើប្រាស់ទឹកអូរ ក្នុងតំបន់សង្ស័យ និងជួយផ្គត់ផ្គង់ទឹកស្អាត ដោយឥតគិតថ្លៃជូនពលរដ្ឋ និងទី៣ អប់រំអនាម័យរស់នៅ និងហូបស្អាតដល់ប្រជាជនក្នុងភូមិ៕
ទឹកព្រែកទេរ ដែលពលរដ្ឋរស់នៅក្នុងឃុំកន្ទួត ស្រុកចិត្របូរី ខេត្តក្រចេះ ពុល។
ក្រុមគ្រូពេទ្យ កំពុងជួយសង្រ្គោះអ្នកភូមិដែលពុលទឹកព្រែក
No comments:
Post a Comment