ពាក្យចុងក្រោយរបស់ Steve Jobs មុនពេលស្លាប់ អ្នកមានអានហើយភ្ញាក់ខ្លួនស្ដាយពេលវេលា

មហាសេដ្ឋី Steve Jobs ដែលជាសហស្ថាបនិករបស់ក្រុមហ៊ុនយក្ស Apple បានស្លាប់នៅថ្ងៃទី៥ ខែតុលា ឆ្នាំ២០១១ ដោយបន្សល់ទុកសមិទ្ធផលរាប់មិនអស់ និងនាំយកបច្ចេកវិទ្យានៃទូរសព្ទទំនើបបំផុត iPhone ផ្ដល់ឲ្យអ្នកប្រើប្រាស់ជាច្រើនលាននាក់ទូទាំងពិភពលោក។ ពាក្យសម្ដីចុងក្រោយរបស់លោក មុនពេលស្លាប់ ត្រូវបានគេចែកចាយព្រោងព្រាតលើបណ្ដាញសង្គម ដោយនិយាយពីការសោកស្ដាយរបស់លោក ដែលប្រឹងរកទ្រព្យសម្បត្តិពេក រហូតភ្លេចគិតពីភាពសប្បាយរីករាយក្នុងជីវិត។ រហូតដល់អស់ពេលវេលា ដេកឈឺលើគ្រែពេទ្យ ទើបនឹកស្ដាយក្រោយ។ ទោះយ៉ាងណា មិនមានប្រភពបញ្ជាក់ថា នេះជាសម្ដីពិតរបស់លោក ឬជាគ្រាន់តែជាការតាក់តែងដើម្បីឲ្យមនុស្សរលឹក ចេះស្រលាញ់ពេលវេលានោះទេ។ ប៉ុន្តែពាក្យនេះ ត្រូវបានចែករំលែករាប់លានដងទូទាំងពិភពលោក។

ខាងក្រោមនេះ ជាសម្ដីទាំងស្រុងរបស់លោក Steve Jobs ដែលនៅតែមានអ្នកចែកចាយបន្តបន្ទាប់៖

«ខ្ញុំបានឈានដល់ចំណុចកំពូលនៃភាពជោគជ័យនៅក្នុងពិភពជំនួញ។ នៅក្នុងភ្នែករបស់អ្នកដទៃជីវិតរបស់ខ្ញុំគឺជាភាពជោគជ័យមួយ។ ទោះយ៉ាងណា ក្រៅពីការងារ ខ្ញុំមានភាពរីករាយតិចតួចណាស់។ នៅទីបញ្ចប់ ទ្រព្យសម្បត្តិគឺគ្រាន់តែជាការពិតនៃជីវិតដែលខ្ញុំធ្លាប់ធ្វើ។ នៅពេលនេះ ខ្ញុំបានឈឺដេកលើគ្រែ ហើយរំលឹកឡើងវិញពេញមួយជីវិតដែលខ្ញុំឆ្លងកាត់ ខ្ញុំដឹងថារាល់ការទទួលស្គាល់ និងទ្រព្យសម្បត្តិដែលខ្ញុំមានមោទនភាពខ្លាំងបំផុត បែរប្រែជាសាបរលាប និងក្លាយជាគ្មានន័យទាល់តែសោះ នៅពេលប្រឈមជិតដល់ពេលស្លាប់។

នៅក្នុងភាពងងឹតមួយ ខ្ញុំសម្លឹងមើលពន្លឺពណ៌បៃតងពីម៉ាស៊ីនទ្រទ្រង់ជីវិត និងឮសម្លេងមេកានិចដ៏អាប់អួ ខ្ញុំអាចមានអារម្មណ៍ថាដង្ហើមនៃក្ដីមរណកាន់តែជិតមកដល់... ឥឡូវខ្ញុំដឹងថា នៅពេលដែលយើងបានប្រមូលទ្រព្យសម្បត្តិគ្រប់គ្រាន់ដើម្បីរស់នៅក្នុងជីវិតរបស់យើង យើងគួរស្វែងរកបញ្ហាផ្សេងទៀតដែលមិនទាក់ទងនឹងទ្រព្យសម្បត្តិ ...

គួរជាអ្វីដែលសំខាន់ជាងនេះ... ប្រហែលជាទំនាក់ទំនង, ប្រហែលជាសិល្បៈ, ប្រហែលជាក្តីសុបិន្តតាំងពីវ័យកុមារ។ ការខិតខំប្រឹងប្រែងឥតឈប់ឈរនៃការប្រមូលទ្រព្យសម្បត្តិ នឹងធ្វើអោយមនុស្សម្នាក់ក្លាយទៅជាមានភាពវឹកវរដូចខ្ញុំ។ ព្រះបានប្រទានឱ្យយើងនូវអារម្មណ៍ ដើម្បីឱ្យយើងចេះផ្ដល់ក្ដីសេចក្ដីស្រឡាញ់ចាក់ចូលទៅក្នុងបេះដូងរបស់មនុស្សគ្រប់គ្នា មិនមែនពីការបំភាន់ដែលបានមកពីទ្រព្យសម្បត្តិនោះទេ។

ទ្រព្យសម្បត្តិដែលខ្ញុំប្រមូលបានក្នុងជីវិតរបស់ខ្ញុំ ខ្ញុំមិនអាចយកទៅជាមួយខ្ញុំទេ។ អ្វីដែលខ្ញុំអាចនាំទៅបាននោះគឺគ្រាន់តែជាការចងចាំ ដោយសេចក្ដីស្រឡាញ់ប៉ុណ្ណោះ។ នោះហើយជាទ្រព្យសម្បត្តិពិត ដែលនឹងដើរតាមអ្នកដោយអមជាមួយអ្នក ផ្តល់ឱ្យអ្នកនូវកម្លាំង និងពន្លឺដើម្បីបន្ត។ សេចក្ដីស្រឡាញ់អាចធ្វើដំណើរបានរាប់ពាន់ពាន់ម៉ៃល៍។ ជីវិតគ្មានដែនកំណត់។ ទៅកន្លែងដែលអ្នកចង់ទៅ។ ឡើងដល់កំពូលដែលអ្នកចង់ឡើង។ វាស្ថិតនៅក្នុងចិត្ត និងនៅក្នុងដៃរបស់អ្នក។

តើគ្រែដ៏ថ្លៃបំផុតនៅលើពិភពលោកគឺជាអ្វី? គឺគ្រែពេទ្យ …
អ្នកអាចជួលនរណាម្នាក់ឱ្យបើកបរឡានសម្រាប់អ្នក រកលុយអោយអ្នក ប៉ុន្តែអ្នកមិនអាចមានអ្នកណាម្នាក់ឈឺជំនួសអ្នកបានទេ។ វត្ថុដែលបាត់បង់អាចត្រូវបានរកឃើញ។ ប៉ុន្តែមានរឿងមួយដែលមិនអាចរកឃើញនៅពេលដែលវាបាត់បង់... នោះគឺជីវិត។ នៅពេលដែលមនុស្សម្នាក់ចូលចូលទៅក្នុងបន្ទប់វះកាត់ គាត់នឹងដឹងថាមានសៀវភៅមួយក្បាលដែលគាត់មិនទាន់បានអាន... គឺ សៀវភៅសុខភាពល្អ។

គ្រប់ដំណាក់កាលនៅក្នុងជីវិតដែលយើងមាននាពេលឥឡូវនេះ ដោយពេលវេលា យើងនឹងប្រឈមមុខនឹងថ្ងៃដែលវាំងននទម្លាក់ចុះមក។ គួររក្សាក្ដីស្រលាញ់សម្រាប់គ្រួសាររបស់អ្នក, ស្រលាញ់ប្តីឬប្រពន្ធរបស់អ្នក, រាប់អានមិត្តរបស់អ្នក។ មើលថែខ្លួនឯងឱ្យបានល្អ។ សប្បាយចិត្តជាមួយអ្នកដទៃ "។»

ខាងក្រោមនេះ ជាប្រវត្តិជីវិតរបស់ Steve Jobs៖

Steve Jobs មានសញ្ជាតអាមេរិក ដែលកើតនៅថ្ងៃទី ២៤ កុម្ភៈ ឆ្នាំ ១៩៥៥ លើដែនដីរដ្ឋសាន់ហ្វ្រាន់ស៊ីស្កូ។ អាយុមិនបានប៉ុន្មានផង បន្ទាប់ពីបើកភ្នែកឃើញផែនដីដ៏ស្រស់ត្រកាល ទារកម្នាក់នេះត្រូវបានឪពុកម្ដាយបំបរបង់ចោល។ ទារកដដែលនេះ ត្រូវបានប្ដីប្រពន្ធមួយគូ គឺនាងក្លារា មានតំណែងជាគណនេយ្យករ និងលោកភូល ចបស៍ មានជំនាញមេកានិច (Clara & Paul Jobs) រើសយកមកចិញ្ចឹមបីបាច់ថែរក្សា។

រយៈកាលក្រោយមក (ដោយប្រភពមិនបានបញ្ជាក់ពីកាលបរិច្ឆេទច្បាស់លាស់) Jobs ក៏បានស្គាល់ពីអត្តសញ្ញាណពិតរបស់ឪពុកម្ដាយបង្កើតរបស់ខ្លួន។ ម្ដាយរបស់គេគឺអ្នកនាង Joanne Simpson ជានិស្សិតបញ្ចប់ថ្នាក់បរិញ្ញាបត្រ និងឪពុករបស់គេ គឺលោកAbdulfattah John Jandali ជានិកាយសាសនាមូស្លីម។ បន្ទាប់ពី Jobs មានទំនាក់ទំនងជាមួយអ្នកម្ដាយបង្កើត (អ្នកនាងSimpson) ដែល របស់នៅឆ្ងាយពីគ្នារាប់ឆ្នាំរួចមក លោក (Jobs) នៅតែរស់នៅឃ្លាតឆ្ងាយពីលោកឪពុកដដែល ព្រោះ Abdulfattah John Jandali បានចាកចេញពីសហរដ្ឋអាមេរិក តាំងពីអាយុ ១៨ ឆ្នាំមកម្ល៉េះ។

បុគ្គលជោគជ័យភាគច្រើន មិនបានរៀនចប់ថ្នាក់ឧត្ដមទេ ជាក់ស្ដែងដូចលោក Steve Jobs បានបញ្ចប់ថ្នាក់វិទ្យាល័យនៅទីក្រុង Cupertino រដ្ឋកាលីហ្វ័ញ៉ា និងបានចុះឈ្មោះចូលរៀនបន្តថ្នាក់ឧត្ដមសិក្សានៅ សាកលវិទ្យាល័យ Reed Collegeបានមួយឆមាស ក៏បោះបង់ចោល ដោយសារមានបញ្ហាហិរញ្ញវត្ថុ។ មានពេលមួយ លោកមានឱកាសឡើងថ្លែងសន្ទរកថាជាលើកដំបូងនៅសាកលវិទ្យាល័យ Stanford។ នាឱកាសនោះ Jobs ក៏បានរំលឹកពីអនុស្សាវរីយដែលលោក ស្នាក់នៅសាកលវិទ្យាល័យ Reed មួយឆមាសបែបនេះថា ”ខ្ញុំដេកផ្ទាល់នឹងឥដ្ឋក្នុងបន្ទប់មិត្តភ័ក្ដិប៉ុណ្ណោះ ព្រោះគ្មានគ្រែដេកទេ។ សម្រាប់អាហារវិញ ខ្ញុំចំណាយតែ ៥សេនប៉ុណ្ណោះក្នុងមួយពេល ព្រោះដោយកត្តាជីវភាព”។

អតីតនាយកប្រតិបត្តិរបស់ក្រុមហ៊ុនបច្ចេកវិទ្យា Apple បានប្រកាន់ខ្ជាប់សាសនាព្រះពុទ្ធ ខណៈដែលប្រជាជនអាមេរិកភាគច្រើនគោរពបូជាសាសនាគ្រិស្ត។ ដោយមើលឃើញពីសក្ដានុពល និងកេរ្តិ៍ឈ្មោះល្បីសុះសាយរបស់ Jobs លើផ្នែកគណនា គំនិតច្នៃប្រឌិតលើបច្ចេកវិទ្យាទូរសព្ទ និងការបង្កើតកម្មវិធីដោយសរសេរកូដ ដូច្នេះលោកក៏បាន អញ្ជើញឲ្យចូលបម្រើការងារខាងផលិតហ្គេមនៅឆ្នាំ ១៩៧៥។

Jobs ទទួលបានទឹកប្រាក់ចំនួន ៧៥០ដុល្លារ សម្រាប់ការអភិវឌ្ឍន៍ហ្គេមមួយ។ ម្យ៉ាងវិញទៀតសម្រាប់សមិទ្ធផលដែលគាត់អាចធ្វើបាន ចេញលក់លើទីផ្សារដោយគ្មានបញ្ហា Error អ្វីនោះនឹងទទួលបានប្រាក់រង្វាន់បន្ថែម ១០០ដុល្លារ ផ្សេងទៀត។ ធ្វើ ការបានមួយរយៈ Jobs ក៏បានទៅជួល Wozniak (បុគ្គលម្នាក់ស្ថិតក្នុងបញ្ជីសហស្ថាបនិកApple) ដើម្បីជួយសម្រួលការងារនេះ។ Wozniak បានរួមចំណែកជាច្រើនក្នុងការងាររបស់ Jobs រហូតដល់ Atari (ក្រុមហ៊ុនដែលគេទាំងពីរបម្រើការឲ្យ) ផ្ដល់ប្រាក់ Bonus ចំនួន ៥០០០ ដុល្លារ ផ្សេងទៀតឲ្យ Wizniak។ ប៉ុន្តែ Jobs បានកិបកេងប្រាក់រង្វាន់នេះ ដោយផ្ដល់ឲ្យបុគ្គលិករបស់ខ្លួន តែ ៣៧៥ ដុល្លារ ប៉ុណ្ណោះ។

ប្អូនស្រី Jobs ជាអ្នកនិពន្ធដ៏ល្បីល្បាញ៖ ស្ថិតក្នុងដំណើរស្វែងរកដំណឹងឪពុកម្ដាយបង្កើត Jobs ក៏បានជួបជាមួយប្អូនស្រីបង្កើតរបស់ខ្លួន(កើតថ្ងៃទី ១៤ ខែមិថុនា ឆ្នាំ ១៩៥៧) គឺនាង Mona Simpson ដែលជាអ្នកនិពន្ធរឿង «Anywhere But Here» ដ៏ល្បីល្បាញម្នាក់។ យោងតាមសម្ដីរបស់មិត្តភ័ក្ដិរបស់ Jobs ដែលរៀនជាមួយគ្នាកាលនៅសាកលវិទ្យាល័យ Reed បានឲ្យដឹងថា Jobs ធ្លាប់មានមិត្តស្រីជាអ្នកចម្រៀងសង់ទីម៉ង់ម្នាក់គឺនាង Joan Baez ហើយពួកគេមានទំនាក់ទំនងស្និទ្ធស្នាលណាស់ ព្រោះទៅណាមកណា ជាមួយគ្នាញឹកញាប់ ប៉ុន្តែរយៈក្រោយមកក៏បែកគ្នាទៅ។ ប្រភពដដែលពុំបានបញ្ជាក់ពីមូលហេតុនៃការបែកបាក់រវាងគូស្នេហ៍មួយ គូនេះ យ៉ាងណានោះទេ។

ឈានមកដល់វ័យ ២៣ ឆ្នាំ Jobs មានទំនាក់ទំនងស្នេហាជាមួយមិត្តស្រីមានជំនាញជាជាងគំនូរ តាំងពីនៅសិក្សាវិទ្យាល័យជាមួយគ្នាគឺនាង Chris Ann Brennan ដោយមិនបានរៀបការរហូតទទួលបានកូនស្រីម្នាក់នៅឆ្នាំ ១៩៧៨ ដែលលោកបានសម្រេចដាក់ឈ្មោះថា Lisa Brennan Jobs។កូនស្របច្បាប់ 3នាក់៖ នៅ ថ្ងៃទី ១៨ មីនា ១៩៩១ Steve Jobs បានចាប់ដៃរៀបអាពាហ៍ពិពាហ៍ជាមួយនាង Laurene Powell Jobs។ ជាចំណងស្នេហារបស់គូស្នេហ៍ទាំងពីរនេះ ពួកគេទទួលបានកូនចំនួនបីនាក់គឺ ប្រុសម្នាក់ និងស្រីពីរនាក់។ កូនប្រុសមានឈ្មោះថា Reed ចាប់កំណើតនៅខែ កញ្ញា ១៩៩១ (បច្ចុប្បន្នអាយុ ២០ឆ្នាំ), កូនស្រីបន្ទាប់គឺនាងEvin កើតនៅខែ សីហា ១៩៩៥ (បច្ចុប្បន្នអាយុ ១៧ឆ្នាំ), និងកូនស្រីពៅគឺនាង Eve កើតនៅឆ្នាំ ១៩៩៨(បច្ចុប្បន្នអាយុ ១៤ឆ្នាំ) ។

Jobs ធ្លាប់សេពគ្រឿងញៀន៖ អ្វីដែលជារឿងមិនគួរឲ្យជឿនោះគឺ Steve Jobs បានសេពសារធាតុញៀន LSD ក្នុងឋានៈជានាយកប្រតិបត្តិរបស់ក្រុមហ៊ុន Apple។ លោកក៏បានអះអាងពីមូលហេតុដែលបណ្ដាលឲ្យលោកសេពសារធាតុញៀននេះថា «វាធ្វើឲ្យខ្ញុំគិតឃើញអ្វីដែលថ្មី ប្លែកៗ» ។ ក្នុងសៀវភៅបទ សម្ភាសន៍មួយ Jobs បាននិយាយថា “អាចចាត់ទុកថាជាបទពិសោធន៍មួយក្នុងចំណោមរឿងរ៉ាវសំខាន់ៗដែលកើត មានឡើងសម្រាប់ជីវិតរបស់លោក។ សារជាតិញៀនដែលមានក្នុង LSD បានរួមចំណែកក្នុងការគិតអ្វីដែលថ្មី សម្រាប់ Apple ឈរនៅលំដាប់កំពូល។”

Jobs ជាបុគ្គលមួយរូបដែលមិនបរិភោគសាច់(លើកលែងត្រី ព្រោះពេលខ្លះហូប)។ ធ្វើបែបនេះមិនមែនដោយសារលោកជាអ្នកបួស ឬងប់ងុលនឹងសាសនានោះទេ គឺពេទ្យតតម្រូវឲ្យតមក្នុងន័យព្យាបាលជំងឺមហារីករបស់លោក។ ប្រាក់ប្រចាំឆ្នាំរបស់Jobs ទទួលបានតែមួយដុល្លារ ប៉ុណ្ណោះ។ Jobs ធ្លាប់បានលើកឡើងកាលពីឆ្នាំ ២០០៧ថា «ក្នុងមួយឆ្នាំ ខ្ញុំទទួលបាន ៥០សេន សម្រាប់គុណសម្បត្តិដែលដឹកនាំឲ្យមានភាពរីកចម្រើន ឯ ៥០សេនផ្សេងទៀតបានពី Performance»៕

Hot News Todays