ក្នុងការអញ្ជើញទៅសម្ពោធដាក់ឲ្យប្រើប្រាស់សណ្ឋាគារលំដាប់ផ្កាយ៥ “The Royal Sands Koh Rong” នៅលើកោះរ៉ុង ខេត្តព្រះសីហនុ នៅព្រឹកថ្ងៃទី២៣ ខែមេសា ២០១៨នេះ សម្ដេច ហ៊ុន សែន បានដាក់ចេញបទបញ្ជា២ និងការព្រមាន១។
ទីមួយ សម្តេច ហ៊ុន សែន បានបញ្ជាឲ្យក្រុមប្រឹក្សាអភិវឌ្ឍន៍កម្ពុជា ដែលមានលោក សុខ ចិន្តាសោភា ជាអគ្គលេខាធិការ សើរើ ពិនិត្យ និងដកហូតយកមកវិញ ព្រោះសព្វថ្ងៃ គឺមានក្រុមហ៊ុនមួយចំនួនដែលបានទទួលអាជ្ញាប័ណ្ណវិនិយោគពីរដ្ឋ ប៉ុន្តែមិនធ្វើ ហើយបានយកទៅលក់ឲ្យក្រុមហ៊ុនដទៃដែលខុសនឹងច្បាប់រដ្ឋ។
ទីពីរ សម្តេច ហ៊ុន សែន បានបញ្ជាឲ្យក្រសួងរៀបចំដែនដី ដែលមានលោក ជា សុផារ៉ា ជារដ្ឋមន្ត្រី ពិនិត្យ និងដោះស្រាយក្បាលដីចំនួន៥៨៤ ជូនប្រជាពលរដ្ឋនៅលើកោះរ៉ុង ឲ្យបានត្រឹមត្រូវ។ ក្បាលដីទាំងនោះ មិនទាន់អាចចេញជូនប្រជាពលរដ្ឋបាន ដោយសារក្បាលដីទាំងនោះ មានវិវាទ និងកំពុងពិនិត្យអត្តសញ្ញាណ។
ប្រភពរូបភាព៖ ហ្វេសប៊ុកផេកសម្ដេច ហ៊ុន សែន
ចុងក្រោយ សម្តេចតេជោនាយករដ្ឋមន្ត្រី បានព្រមានធ្ងន់ៗទៅកាន់អ្នកមានអំណោច និងអ្នកមានទ្រព្យមួយចំនួន ដែលកន្លងមកតែងតែមកកាង កាន់កាប់ និងទន្ទ្រានយកដីរដ្ឋមួយចំនួននៅតំបន់កោះរុងនេះ គឺត្រូវតែដកខ្លួនចេញជាបន្ទាន់។ សម្ដេចតេជោថា ពួកអ្នកមកទន្ទ្រាន គឺភាគច្រើនមិនមែនរស់នៅកោះរ៉ុងនោះទេ គឺមួយចំនួនរស់នៅក្រុងភ្នំពេញ ឬកន្លែងផ្សេងៗ។
ទន្ទឹមនឹងនេះ សម្តេចតេជោ បានបញ្ជាឲ្យអភិបាលខេត្តព្រះសីហនុ លោក យន្ត មីន ពិនិត្យ និងបញ្ឈប់អំពើកាប់ឈើ ទន្ទ្រានយកដី ឬយកឈើលក់ខុសច្បាប់ជាបន្ទាន់។ ជាមួយគ្នានេ សម្ដេចតេជោបានណែនាំឲ្យលោក សៅ សុខា មេបញ្ជាការកងរាជអាវុធហត្ថលើផ្ទៃប្រទេស ប្រើប្រាស់កម្លាំងចាត់វិធានការលើអ្នកកាប់ឈើ ទន្ទ្រានយកដី ឬយកឈើលក់ខុសច្បាប់ផងដែរ៕
ប្រភពរូបភាព៖ ហ្វេសប៊ុកផេកសម្ដេច ហ៊ុន សែន
អត្ថបទ៖ វាសនា
No comments:
Post a Comment