រថយន្តដែលត្រូវបានបើកឆ្លងកាត់ផ្លូវរថភ្លើង ផ្ទុកមនុស្ស ៣ ទៅ ៤នាក់ ត្រូវរថភ្លើងដែលចេញដំណើរ ពីប៉ោយប៉ែតទៅក្រុងសិរីសោភ័ណបុករុញជាង ៥០ម៉ែត្រ កាលពីម៉ោងប្រហែល ១១ព្រឹក ថ្ងៃទី២១ ខែមេសា ឆ្នាំ២០១៨ ស្ថិតនៅភូមិគីឡូម៉ែត្រ លេខបួន សង្កាត់ផ្សារកណ្តាល ក្រុងប៉ោយប៉ែត ខេត្តបន្ទាយមានជ័យ។ នេះបើតាមវេបសាយ អគ្គស្នងការដ្ឋាននគរបាលជាតិ។
រថភ្លើង បុករុញរថយន្ត ជាង ៥០ម៉ែត្រ នៅភូមិគីឡូម៉ែត្រ លេខបួន សង្កាត់ផ្សារកណ្តាល ក្រុងប៉ោយប៉ែត ខេត្តបន្ទាយមានជ័យ នាថ្ងៃទី២១មេសា
បើតាមសេចក្ដីរាយការណ៍បានឲ្យដឹងថា នៅពេលរថភ្លើងបុករថយន្ត គឺរថភ្លើង ចេញពីស្ថានីយ ប្រមាណជាង ១គីឡូម៉ែត្រ ក៏មានរថយន្ត នីសាន់ ២ បាំង ពណ៌ ស ពាក់ស្លាក់ លេខភ្នំពេញ 2A-8727 បើកឆ្លងកាត់ផ្លូវរថភ្លើង ពីត្បូងមកជើង ខណៈពេលដែលរថភ្លើងកំពុងចេញដំណើរពី ប៉ោយប៉ែតទៅ ស៊ីសូផុន ឬ សិរីសោភ័ណ បានបុករុញ។ ក្នុងហេតុការណ៍នេះ គ្មានអ្នករងរបួសធ្ងន់ធ្ងរទេ តែអ្នកដំណើរក្នុងរថយន្ត ភ័យទន់ដៃទន់ជើង រួចសន្លប់។
អ្នកដំណើរទាំងនេះ ត្រូវបានដឹកបញ្ជូនទៅមន្ទីរពេទ្យបង្អែកក្រុងប៉ោយប៉ែត។ ចំណែករថយន្តបានកំពិតមួយចំហៀង (ខាងឆ្វេង)។
រថភ្លើង បុករុញរថយន្ត ជាង ៥០ម៉ែត្រ នៅភូមិគីឡូម៉ែត្រ លេខបួន សង្កាត់ផ្សារកណ្តាល ក្រុងប៉ោយប៉ែត ខេត្តបន្ទាយមានជ័យ នាថ្ងៃទី២១មេសា
គួររំឭកថា ករណីគ្រោះថ្នាក់ចរាចរណ៍ដោយរថភ្លើងបុកនៅខេត្តបន្ទាយមានជ័យកើតមាន២ករណីហើយ។ ករណីទី១កាលពីថ្ងៃទី០៧ ខែមេសា ឆ្នាំ២០១៨ ដែលបុករថយន្តកាម៉ារីគ្មានអ្នករងគ្រោះធ្ងន់ធ្ងរទេ តែខូចខាតរថយន្ត ដែលកើតឡើងនៅម្តុំផ្សារគុត្តសត ស្រុកអូរជ្រៅ។ ករណីទី២ នៅសង្កាត់ផ្សារកណ្តាលក្រុងប៉ោយប៉ែត ដោយគ្មានរងគ្រោះធ្ងន់ធ្ងរដូចគ្នា៕
រថភ្លើង ដែលបុករថយន្ត
រូបភាព៖ ដើមអម្ពិល
អត្ថបទ៖ លាភ.
No comments:
Post a Comment