ក្រសួងកសិកម្ម រុក្ខាប្រមាញ់ និងនេសាទ ដោយមានការគាំទ្រពីរដ្ឋបាលខេត្តកែប បានអនុម័តជាផ្លូវការ នូវការបង្កើតតំបន់គ្រប់គ្រងជលផលសមុទ្រ ចំនួនជាង ១ម៉ឺនហិកតា នៅខេត្តកែប តាមរយៈប្រកាសលេខ១៩៣ ប្រក កសក ចុះថ្ងៃទី១២ខែមេសា ឆ្នាំ២០១៨។
រូបសំណាកតំណាងឲ្យខេត្តកែប
ការបង្កើតតំបន់គ្រប់គ្រងជលផលនេះ គឺក្នុងគោលបំណងទប់ស្កាត់បទល្មើសនេសាទ ធានាបានការនេសាទជាលក្ខណៈគ្រួសារ ការពារធនធានជីវចម្រុះជលផលប្រកបដោយប្រសិទ្ធភាព និងចួលរួមលើកកម្ពស់វិស័យទេសចរណ៍ធម្មជាតិ។
តំបន់គ្រប់គ្រងដែលមានផ្ទៃដីជាង ១ម៉ឺនហិកតា រួមមាន៖
- កន្លែងអភិរក្សជលផល ៣កន្លែង ស្ថិតក្នុងភូមិកែប សង្កាត់កែប ក្រុងកែប ដែលមានផ្ទៃដីសរុបចំនួន ១០៩ហិកតា
- កន្លែងការពារជលផលចំនួន ១០៤១២ ហិកតា ១កន្លែង ស្ថិតក្នុងស្រុកដំណាក់ចង្អើរ និងក្រុងកែប
- ដែនជម្រកសុវត្ថិភាពជលផល ចំនួន ៤១៧ហិកតា ១កន្លែង ស្ថិតក្នុងស្រុកដំណាក់ចង្អើរ និងក្រុងកែប
- កន្លែងអេកូទេសចរណ៍បាតសមុទ្រ សរុបចំនួន ៣៦៩ហិកតា មាន ៤កន្លែង ក្នុងភូមិកែប សង្កាត់កែប ក្រុងកែប។
ប្រជានេសាទម្នាក់ កំពុងឈរលើទូក
តំបន់គ្រប់គ្រងជលផលសមុទ្រទាំងនេះ ស្ថិតនៅប្រជុំកោះពោធិ៍ និងកោះទន្សាយ ខេត្តកែប ដែលក្នុងនោះរួមមាន កោះពោធិ៍ កោះស្វាយព្រៃ កោះហាលត្រី កោះមាក់ប្រាង កោះអាចម៍សេះ កោះអង្ក្រង កោះស្ងួត កោះទន្សាយ កោះស្វាយ កោះកុក កោះម្ទេស និងកោះត្បាល់ ស្ថិតក្នុងដែននេសាទនៃភូមិសាស្ត្រក្រុងកែប និងស្រុកដំណាក់ចង្អើរ ខេត្តកែប៕
No comments:
Post a Comment