នគរបាលរាជធានីភ្នំពេញ បានរៀបចំកម្លាំងសម្រាប់ធ្វើអន្តរាគមន៍ចំនួន ៣ដំណាក់កាល ក្នុងដំណើរការបោះឆ្នោតជ្រើសតាំងតំណាងរាស្រ្តនីតិកាលទី៦ ឆ្នាំ២០១៨នេះ។ នេះបើតាមការថ្លែងបញ្ជាក់របស់លោក ជួន សុវណ្ណ ស្នងការនគរបាលរាជធានី នាព្រឹកថ្ងៃទី២៥កក្កដានេះ ក្នុងពិធីសំណេះសំណាល ត្រួតពិនិត្យកងកម្លាំងនគរបាលរាជធានីភ្នំពេញ ដែលមានភារកិច្ចការពារ សន្តិសុខ សណ្តាប់ធ្នាប់ សម្រាប់ដំណើរការបោះឆ្នោត។ ពិធីនេះ ធ្វើឡើងនៅពហុកីឡដ្ឋានជាតិ ក្រោមអធិបតីភាពលោក ឃួង ស្រេង អភិបាលរាជធានីភ្នំពេញ។
លោក ជួន សុវណ្ណ ថ្លែងក្នុងពិធីសំណេះសំណាលជាមួយកម្លាំងនគរបាលរាជធានីភ្នំពេញ នាព្រឹកថ្ងៃទី២៥កក្កដា ២០១៨ នៅពហុកីឡដ្ឋានជាតិ
ដំណាក់កាលទាំង៣នោះរួមមាន៖
ទី១. ការពារសកម្មភាព យុទ្ធនាការឃោសនាបោះឆ្នោតជ្រើសតាំងតំណាងរាស្រ្តនីតិកាលទី៦ របស់គណបក្សនយោបាយទាំង ១៩ លើ ២០គណបក្ស ដែលបានឈរឈ្មោះបោះឆ្នោត ក្នុងរាជធានីភ្នំពេញ រយៈពេល ២១ថ្ងៃ ពីថ្ងៃទី៧ ដល់ ២៧ ខែកក្កដា ឆ្នាំ២០១៨។
ទី២. ប្រមូលផ្តុំកម្លាំងទាំងអស់ ការពារគ្រប់ទីស្នាក់ការបោះឆ្នោត គណៈកម្មការឃុំសង្កាត់រៀបចំការបោះឆ្នោត ការិយាល័យបោះឆ្នោត ការរាប់សន្លឹកឆ្នោត ការដឹកជញ្ជូនសម្ភារឯកសារបោះឆ្នោត និងកំណត់ហេតុបូកសរុបលទ្ធផលនៃការបោះឆ្នោត តាមការិយាល័យបោះឆ្នោតនីមួយៗទៅកាន់ គ.ជ.ប។
ទី៣. ប្រមូលផ្តុំកម្លាំងត្រៀមអន្តរាគមន៍ សម្រាប់ការពារសន្តិសុខ សុវត្ថិភាពសណ្តាប់ធ្នាប់ ក្នុងឱកាស មុន ក្នុង និងក្រោយការប្រកាសលទ្ធផលនៃការបោះឆ្នោតជ្រើសតាំងតំណាងរាស្រ្តនីតិកាលទី៦ ចប់ជាស្ថាពរ។ ក្នុងនោះរួមមាន៖
- កម្លាំងការពារយុទ្ធនាការឃោសនាបោះឆ្នោត ប្រើប្រាស់កម្លាំង ចំនួន ១២៥៥នាក់។
- កម្លាំងការពារការិយាល័យបោះឆ្នោត និងរាប់សន្លឹកឆ្នោត ចំនួន ២១៣៨ការិយាល័យ លើ ២៦៦ទីតាំង ប្រើប្រាស់កម្លាំងចំនួន ៤៥០៥នាក់។
- កម្លាំងត្រៀមអន្តរាគមន៍ចល័តការពារភូមិសាស្រ្តខាងក្រៅ ប្រើប្រាស់កម្លាំងចំនួន ៤៨០នាក់
- កម្លាំងការិយាល័យវិទ្យុទាក់ទង ចំនួន ២៦៤នាក់។
កម្លាំងនគរបាលរាជធានីភ្នំពេញ ដែលចូលរួមក្នុងពិធីសំណេះសំណាល នាព្រឹកថ្ងៃទី២៥កក្កដា ២០១៨ នៅពហុកីឡដ្ឋានជាតិ
លោក ជួន សុវណ្ណ បានបញ្ជាក់ថា កងកម្លាំងទាំងអស់ដែលបានរៀបចំខាងលើ មានភារកិច្ច បង្ការ ទប់ស្កាត់ និងបង្រ្កាប រាល់ករណី ដែលបង្កឱ្យមានការរាំងស្ទះដល់ដំណើរការបោះឆ្នោតជ្រើសតាំងតំណាងរាស្រ្ត៕
អត្ថបទ៖ សំភី
No comments:
Post a Comment