មានការចាប់អារម្មណ៍ជាខ្លាំងពីមជ្ឈដ្ឋានទូទៅ ក្រោយរូបភាពជាច្រើនសន្លឹកនៃក្រុមនិស្សិតវិទ្យាស្ថាន ស៊ីតិក នាំគ្នាស្លៀកឈុតបុរាណសម័យកាលហ្លួងស៊ីសុវត្ថិ ដើម្បីត្រៀមទទួលស្វាគមន៍ក្នុងថ្ងៃទទួលសញ្ញាបត្របញ្ចប់ការសិក្សារបស់ពួកគេ។
និស្សិត ចាន់ថន វីរៈ គឺជាបុគ្គលម្នាក់នៅពីក្រោយការរៀបចំឈុតដ៏ពិសេសនេះឡើង។ វីរៈប្រាប់ថា ពួកគេគឺជាក្រុមនិស្សិតផ្នែកឌីហ្សាញ ដែលផ្ដោតទៅការរចនាម៉ូតផ្ទះ ម៉ូតអគារជាដើម ដែលសុទ្ធសឹងតែជាមិត្តរួមថ្នាក់តែងទៅណាមកណាជាមួយគ្នា។ មូលហេតុដែលវីរៈ បំផុសគំនិតឲ្យស្លៀកពាក់ឈុតសម័យបុរាណបែបនេះ ព្រោះខ្លួនធ្លាប់បានហាត់រៀនរបាំពីមុនមក ហើយក៏ធ្លាប់បានស្លៀកឈុតហ្លួងស៊ីសុវត្ថិនេះ ក្នុងថ្ងៃគម្រប់ខួប១០០ឆ្នាំ នៅសាលារចនា។ ចាប់ពីពេលនោះមកក៏មានចិត្តស្រលាញ់ឈុតនេះជាខ្លាំង ហើយក៏នឹកឃើញថា បើបបួលមិត្តភក្ដិយកឈុតនេះស្លៀក (Pre-Graduation) គឺកាន់តែស្រស់ស្អាតថែមទៀត។
និស្សិត ចាន់ថន វីរៈ
យុវជនមានស្រុកកំណើតមកពីខេត្តកណ្ដាលរូបនេះ ប្រាប់ទៀតថា និស្សិតដែលចូលរួមស្លៀកឈុតបុរាណនេះ សរុបទាំងអស់១៤នាក់។ ចំពោះការចំណាយលើការរៀបចំមិនអស់មិនច្រើនប៉ុន្មានឡើយ ព្រោះក្បិនទាំងនោះ វីរៈ បានខ្ចីពីលោកគ្រូ ហង្ស ភូមិរ៉ា។ ចំណែកឯអាវផ្នែកប្រុសៗ គឺពួកគេមានស្រាប់ហើយ។ ចំណែកឯខាងនារី គ្រាន់តែចំណាយលុយទិញស្បៃអស់តែ ៤ម៉ឺនរៀលទេ។ យ៉ាងណាក្ដីក៏មានការលើកឡើងថា ឈុតផ្នែកនារីមិនមានគ្រប់ទម្រង់ នៅមានការខ្វះចន្លោះច្រើន។ វីរៈ ក៏ទទួលស្គាល់ទៅលើការលើកឡើងនេះមែន ប៉ុន្តែតំណាងឲ្យក្រុមទាំងមូល វីរៈ ក៏សូមអភ័យទោសពីពុកម៉ែបងប្អូនទាំងអស់គ្នាផង។
ការរៀបចំទាំងមូល គឺវីរៈ ជាអ្នករត់បោលសព្វគ្រប់បែបយ៉ាង ដើម្បីឲ្យក្ដីស្រមៃរបស់ខ្លួនបានសម្រេច។ យុវជនវ័យ២៥ឆ្នាំរូបនេះ បង្ហាញអារម្មណ៍រំភើបយ៉ាងក្រៃលែង ក្រោយបំណងរបស់ខ្លួនបានសម្រេច៕
ចង់ដឹងថាឈុតសម័យកាលហ្លួងស៊ីសុវត្ថិស្រស់ស្អាតប៉ុណ្ណាសូមទស្សនាទាំងអស់គ្នា៖
ឯកសណ្ឋានពិតប្រាកដរបស់វិទ្យាស្ថាន ស៊ីតិច
អត្ថបទ៖ ថោ ច័ន្ទឬទ្ធិ
រូបភាព៖ ផ្ដល់ឲ្យ
No comments:
Post a Comment