ក្រោយធ្លាក់ក្នុងវគ្គសន្សំពិន្ទុតាមពូលជាលើកដំបូង ក្នុងរយៈពេល ៨០ឆ្នាំចុងក្រោយ នៃ FIFA World Cup ក្រុមបាល់ទាត់ជម្រើសជាតិអាល្លឺម៉ង់ បានផ្ញើសារសូមទោសអ្នកគាំទ្រ នាថ្ងៃទី២៨ ខែមិថុនានេះ តាមរយៈទំព័រ Facebook ផ្លូវការរបស់ខ្លួន។
កីឡាករអាល្លឺម៉ង់ Ozil ខកចិត្ត ក្រោយចាញ់កូរ៉េខាងត្បូង (រូបភាព៖ Reuters)
សារសូមទោសរបស់ក្រុមជម្រើសជាតិអាល្លឺម៉ង់ ជាខ្លឹមសារជាខេមរភាសា ដូចខាងក្រោម៖
"ជូនចំពោះអ្នកគាំទ្រ!
ពួកយើងពិតជាមានអារម្មណ៍ខកចិត្ត ដូចអ្នកទាំងអស់គ្នាដែរ។ World Cup មានតែម្ដងប៉ុណ្ណោះ ក្នុងរយៈពេល ៤ឆ្នាំ ហើយយើងរំពឹងខ្ពស់ជាងនេះឆ្ងាយណាស់។ ពួកយើងសូមទោស ដែលលេងមិនសមជាក្រុមជើងឯកពិភពលោក។ យើងពិតជាឈឺចាប់ យើងជាក្រុមដែលសមនឹងធ្លាក់បែបនេះ។
ការគាំទ្ររបស់អ្នកទាំងអស់គ្នា គឺពិតជាអស្ចារ្យ ទាំងនៅអាល្លឺម៉ង់ ទាំងនៅរុស្ស៊ី និងទាំងនៅប្រទេសនានាទូទាំងពិភពលោក។ យើងបានអបអរជាមួយគ្នា កាលលើកពាន (World Cup) នៅទីក្រុងរីយ៉ូ ឆ្នាំ២០១៤ ប៉ុន្តែបាល់ទាត់គឺបែបនេះ ពេលខ្លះអ្នកត្រូវតែទទួលយកបរាជ័យ ហើយត្រូវទទួលស្គាល់ថា គូប្រកួតរបស់អ្នក គឺពិតជាលេងបានល្អជាងអ្នក។
ជាថ្មីម្ដងទៀត យើងសូមជូនពរក្រុមជម្រើសជាតិស៊ុយអែត និងម៉ិកស៊ីកូ ដែលបានឡើងទៅជុំបន្ត ហើយក៏អបអរកូរ៉េខាងត្បូង ចំពោះជ័យជម្នះលើពួកយើង។
សូមអរគុណ [រុស្ស៊ី] សម្រាប់ការទទួលស្វាគមន៍យ៉ាងកក់ក្ដៅ! "
អ្នកគាំទ្រអាល្លឺម៉ង់ បង្ហាញអារម្មណ៍សោកសៅ ក្រោយអាល្លឺម៉ង់ ធ្លាក់ចេញពី World Cup (រូបភាព៖ Reuters)
គួររំលឹកផងដែរថា ក្រុមបាល់ទាត់ជម្រើសជាតិអាល្លឺម៉ង់ បានធ្លាក់ចេញពី FIFA World Cup 2018 ត្រឹមវគ្គចែកពូល ក្រោយចាញ់ក្រុមកូរ៉េខាងត្បូង ២-០ កាលពីយប់មិញ។ លទ្ធផលនេះ មានន័យថា អាល្លឺម៉ង់ ទទួលបានតែ ៣ពិន្ទុប៉ុណ្ណោះ ខណៈក្រុម២ផ្សេងទៀត គឺស៊ុយអែត និងម៉ិកស៊ីកូ ទទួលបាន ៦ពិន្ទុ។ ក្នុងប្រវត្តិ World Cup អាល្លឺម៉ង់ ធ្លាប់ធ្លាក់ក្នុងពូលតែម្ដងប៉ុណ្ណោះ គឺកាលពីឆ្នាំ ១៩៣៨ (៨០ឆ្នាំមុន)៕
អត្ថបទទាក់ទង៖
អត្ថបទ៖ សុខ សុវត្ថិ
No comments:
Post a Comment