សម្តេចនាយករដ្ឋមន្រ្តី ហ៊ុន សែន បានប្រកាសថា សម្រាប់បុណ្យភ្ជុំបិណ្ឌ ក្នុងឆ្នាំ២០១៨នាពេលខាងមុខ សាលារាជធានីភ្នំពេញ នឹងត្រៀមរថយន្តក្រុងប្រមាណ ២០០គ្រឿង ដឹកជញ្ជូនកម្មករទៅស្រុកកំណើត ដោយមិនយកលុយ ដើម្បីជួយកាត់បន្ថយការចំណាយរបស់កម្មករ។ ការប្រកាសនេះ បានធ្វើឡើងនៅក្នុងពិធីសំណេះសំណាលជាមួយសហជីពកម្មករប្រមាណជាង ៤ពាន់នាក់ នៅកោះពេជ្រនាព្រឹកថ្ងៃទី២២ ខែមេសា ឆ្នាំ២០១៨។
សម្តេច ហ៊ុន សែន ថ្លែងក្នុងពិធីសំណេះសំណាលជាមួយសហជីពកម្មករ នៅកោះពេជ្រ នាព្រឹកថ្ងៃទី២២ ខែមេសា ឆ្នាំ២០១៨។ រូបថត៖ FB សម្តេច ហ៊ុន សែន
នៅក្នុងពិធីនេះ សម្តេច ហ៊ុន សែន បានកោតសរសើរ និងថ្លែងអំណរគុណចំពោះសេវារថយន្តក្រុង របស់សាលារាជធានីភ្នំពេញ ដែលបានដឹកជញ្ជូនប្រជាពលរដ្ឋ កម្មករកម្មការិនី ទៅស្រុកកំណើត ក្នុងអំឡុងពេលបុណ្យចូលឆ្នាំថ្មីខ្មែរកាលពីពេលថ្មីៗនេះ ដោយមានអ្នកខ្លះមិនទាន់វិលត្រឡប់មកវិញនៅឡើយ។
បើតាមទិន្នន័យរបស់រដ្ឋាករស្វយ័តដឹកជញ្ជូនសាធារណៈ បានឲ្យដឹងថា អ្នកជិះរថយន្តក្រុងសាធារណៈរបស់សាលារាជធានីភ្នំពេញ ដោយឥតគិតថ្លៃ ទៅមកភ្នំពេញ-ខេត្ត តាមផ្លូវជាតិលេខ១, ៣, ៤, ៥ និង៦ ពីថ្ងៃទី១២ ដល់ ១៨ ខែមេសា ឆ្នាំ២០១៨ គឺមានចំនួនសរុប ១៤០៧៨នាក់។ ក្នុងនោះពីភ្នំពេញ ទៅខេត្ត មានចំនួន ៨៨៣៣នាក់ និងពីខេត្តមកភ្នំពេញ មានចំនួន ៥២៤៥នាក់ ជាមួយនឹងរថយន្តក្រុងសរុប ៦០គ្រឿង។
សម្តេចនាយករដ្ឋមន្រ្តី បានបញ្ជាក់នាពេលកន្លងមកថា មូលហេតុដែលជំរុញឲ្យសម្ដេច សម្រេចជូនសេវារថយន្តក្រុងមិនគិតថ្លៃនេះ គឺដោយសារតែ កាលពីឆ្នាំមុនៗ សម្ដេចបានអំពាវនាវសុំឲ្យក្រុមហ៊ុនដឹកជញ្ជូនកុំដំឡើងថ្លៃដល់អ្នកធ្វើដំណើរដែលទៅលេងស្រុកកំណើត ក្នុងឱកាសពិធីបុណ្យចូលឆ្នាំប្រពៃណីខ្មែរ ប៉ុន្តែមិនមានប្រសិទ្ធភាពនោះទេ។ ដូច្នេះហើយទើបសម្ដេចបានពិភាក្សាជាមួយសាលាក្រុងភ្នំពេញ ហើយសម្រេចផ្ដល់សេវាដឹកជញ្ជូនឥតគិតថ្លៃនេះតែម្ដង៕
ប្រជាពលរដ្ឋឡើងជិះរថយន្តក្រុងនៅម្តុំផ្លូវ៦០ម៉ែត្រ កាលពីថ្ងៃទី១៣ ខែមេសា ឆ្នាំ២០១៨
អត្ថបទ៖ សំភី
No comments:
Post a Comment