យប់មិញនេះ រោងភាពយន្ត Major Cineplex by Smart បើកដំណើរការរោងភាពយន្តថ្មីដល់ទៅ២កន្លែងផ្សេងគ្នា គឺនៅ Sorya Center Point និងសាខាខេត្តសៀមរាប ដើម្បីឆ្លើយតបតម្រូវការបន្ថែមរបស់អតិថិជន ហើយក៏ជាឱកាសមួយសម្រាប់ផលិតករភាពយន្តខ្នាតធំបង្ហាញស្នាដៃរបស់ខ្លួនកាន់តែច្រើនដែរ។
បច្ចុប្បន្នចំនួនអ្នកទៅទស្សនាភាពយន្តនៅតាមរោងភាពយន្តទំនើបកំពុងតែកើនឡើងគួរឱ្យកត់សម្គាល់ ក្នុងនោះរោងភាពយន្ត Major Cineplex by Smart បើកដំណើរការសាខាទីមួយ លើកដំបូងនៅឆ្នាំ ២០១៤ ក៏ទទួលបានភាពជោគជ័យជារៀងរាល់ឆ្នាំ។ កត្តានៃភាពជោគជ័យ និងចេះតែពង្រីកបន្តនេះ លោក សៅ សុខនី នាយកគ្រប់គ្រង Major Cineplex by Smart បានប្រាប់ឱ្យដឹងថា ដោយសារការជ្រើសរើសផលិតផលដ៏ត្រឹមត្រូវ ដែលឆ្លើយតបនឹងតម្រូវការ ជាពិសេសគុណភាព របស់ Major គឺ សេវាកម្មដែលអតិថិជនពេញចិត្ត។
ក្រៅពីនោះលោក សុខនី បញ្ជាក់ថា Major Cineplex by Smart មានធនធានមនុស្សដ៏មានសម្ថភាពយល់ច្បាស់ពីការងារជាក្រុម ជាមួយទីតាំងដ៏សមប្រកប និងការដាក់តម្លៃត្រឹមត្រូវសមល្មមនឹងស្តង់ដារចំណាយរបស់ប្រជាពលរដ្ឋក្នុងទីក្រុងភ្នំពេញ និងក្នុងខេត្តសៀមរាប។
ទាក់ទងនឹងការបោះទុនពង្រីកសាខាថ្មីជាបន្តបន្ទាប់ លោក សៅ សុខនី បញ្ជាក់ថា Major Cineplex by Smart ប្រើប្រាស់ចំណូលដែលចំណេញពីសាខាទី ១ នៅផ្សារទំនើប អុីអន ១ និងការបង្រ្គប់បន្ថែមដោយម្ចាស់ភាពហ៊ុនដៃគូ គឺមិនមានការវិនិយោគពីខាងក្រៅបន្ថែមទៀតនោះទេ។ លើសពីនេះទៀត លោក សុខនី ក៏ថ្លែងបញ្ជាក់ពីដំណឹងការបើកសាខាធំ ទី ៤ បន្ថែម ជាមួយបច្ចេកវិទ្យា IMAX ដែលជារោងភាពយន្តអេក្រង់យក្ស ជាមួយនឹងបច្ចេកវិទ្យាបំពងសំឡេងងចុងក្រោយបង្អស់របស់រោងភាពយន្តអន្តរជាតិនាពេលឆាប់ៗទៀតនេះ៕
រូបភាពនៃការបើកសម្ពោធជាផ្លូវការ រោងភាពយន្ត Major Cineplex by Smart ដែលរៀបចំឡើងនៅផ្សារទំនើប Sorya៖
អត្ថបទ៖ Sunny
No comments:
Post a Comment