បុគ្គលបច្ចេកវិទ្យា ១២ រូបខំជំនះបង្កើតរឿងអស្ចារ្យមិនធ្លាប់មាននៅកម្ពុជា

ត្បិតថា បច្ចុប្បន្នលេចចេញស្នាដៃថ្មីៗបន្តបន្ទាប់របស់យុវជនខ្លាំងៗក្នុងស្រុកពិតមែន បើត្រឡប់ទៅមើល សមិទ្ធផលដំបូងៗរបស់បុគ្គលបច្ចេកវិទ្យាទាំងនេះ សុខចិត្តលះបង់ពេលវេលា កម្លាំងកាយចិត្តព្រមទាំងថវិកាផ្ទាល់ខ្លួន ពិតជារឿងមិនងាយស្រួលប៉ុន្មានទេ។

ទោះជាមិនពិសេសជាងគេតែក៏អាចចាត់ទុកថាជា ស្នាដៃដ៏កម្រមួយ ឬជារបកគំហើញថ្មីនៃបច្ចេកវិទ្យា សម្រាប់សម្រួលដល់ការរស់នៅនៃពលរដ្ឋកម្ពុជាបានមួយផ្នែកធំ។

Sabay នឹងណែនាំប្រិយមិត្តឲ្យស្គាល់ពីយុវជននិងកូនខ្មែរឆ្នើមៗជើងចាស់-ថ្មីទាំង ១២ រូបបង្កើតរឿងអស្ចារ្យដូចខាងក្រោម៖

#១) លោក ញាន ផល្លឹក ស្ថាបនិករថយន្តអង្គរខ្មែរ

ជាបុគ្គលម្នាក់ដែលធ្វើឲ្យ កម្ពុជាល្បីកក្រើកដល់បរទេសកាលពី ១៥ ឆ្នាំមុន តាមរយៈការផលិតបាន រថយន្តដ៏តូចច្រឡឹងដំណើរការដោយថាមពលពន្លឺព្រះអាទិត្យ ជាគំនិតច្នៃប្រឌិតដ៏អស្ចារ្យ។ ការផលិតនោះទៀតសោត ជាការដំឡើងដោយដៃផ្ទាល់ គ្មានរោងចក្រដំឡើងនោះទេ។

រថយន្តអង្គរមិនត្រឹមទទួលស្គាល់ពីពលរដ្ឋក្នុងស្រុក តែក៏ទទួលបានការកោតសរសើររហូតដល់បណ្ដាញផ្សព្វផ្សាយក្រៅស្រុកធំៗ និងវិនិយោគទុនបរទេសបានចុះមកទស្សនាព្រោងព្រាត។

#២) លោក ដាញ់ ហុង ស្ថាបនិកបង្កើតប្រព័ន្ធអក្សរខ្មែរយូនីកូដ

ជាអ្នកត្រួសត្រាយផ្លូវឲ្យមានប្រព័ន្ធអក្សរខ្មែរយូនីកូដមកប្រើសម្រាប់វាយអត្ថបទនៅលើកុំព្យូទ័រ និងអ៊ីនធឺណិតឲ្យកាន់តែងាយស្រួលជាង ប្រព័ន្ធលីមូន(Limon)។ ចំពោះស្នាដៃនេះ ជាការរួមចំណែកយ៉ាងសំខាន់ក្នុងការលើកស្ទួយអក្សរសាស្ត្រខ្មែរខ្ពស់មុខខ្ពស់មាត់ និងទទួលបានការគាំទ្រយ៉ាងខ្លាំងក្លាពីពលរដ្ឋកម្ពុជា។

#៣) 4KhmeriPhone ក្រុមអ្នកស្នើបញ្ចូលពុម្ពអក្សរខ្មែរលើប្រព័ន្ធ iOS

សមាជិកក្រុម 4KhmeriPhone

រាល់ពេលក្រុមការងារទាក់ទងទៅ 4Khmeriphone បានត្រឹមឆ្លើយឆ្លងតាមទូរសព្ទនិងបណ្ដាញសង្គមប៉ុណ្ណោះ ពួកគេមិនដែលបង្ហាញខ្លួនឲ្យអ្នកប្រើប្រាស់ នៅកម្ពុជាបានឃើញមុខឡើយ។ ទោះយ៉ាងនេះក្ដី 4KhmeriPhone ជាក្រុមត្រួសត្រាយស្នើដាក់បញ្ចូលពុម្ពអក្សរខ្មែរលើប្រព័ន្ធ iOS ដំបូងគេ ដើម្បីឲ្យអ្នកប្រើអាចវាយអក្សរខ្មែរនៅលើខបករណ៌ iOS បានរលូន។

ឆ្នាំ ២០១៦ ក្រុមនេះបានសហការជាមួយក្រុមហ៊ុនជំនាញពុម្ពអក្សរខាងលើ ដោះស្រាយបញ្ហាអក្សរខ្មែរបាត់ដៃបាត់ជើង រហូតជោគជ័យ ១០០ ភាគរយលើ iOS 10 Beta 5 ហើយប្រើស្រួលដល់សព្វថ្ងៃ។

ដោយការមមាញឹកនឹងការងារក៏ដូចជារបរចិញ្ចឹមជីវិតរបស់សមាជិកក្រុម ក៏សម្រចថាមិនបន្តការងារនេះទៀតដោយទុកឲ្យអ្នកជំនាន់ក្រោយបន្តការងារនេះតទៅទៀត។ ចំណែកស្នាដៃរបស់ក្រុមចុងក្រោយបង្កើតបានក្ដារចុចផ្សេងៗនៅលើ App Store ដូចជា Khmer eKeybord ជាដើម។

#៤) លោក ទី រ៉ាឌី ស្ថាបនិកវិបសាយទិញលក់អនឡាញដំបូងគេ

ប្រិយមិត្តដែលចូលចិត្តទិញ-លក់ទំនិញតាមអនឡាញប្រាកដជាស្គាល់វិបសាយ Khmer 24 ដែលអាចឲ្យអ្នកទិញ ឬដាក់លក់ផលិតផលទំនិញសព្វសារពើ ចាប់ពីគ្រឿងប្រើប្រាស់ទូទៅ រហូតដល់គ្រឿងសម្ភារៈទំនើប។

មុននឹងជោគជ័យក្លាយជាវិបសាយទិញលក់អនឡាញដ៏ល្បីល្បាញនេះ ស្ថាបនិកលោក ទី រ៉ាឌី តស៊ូខំបង្កើតឡើងតាំងពីឆ្នាំ ២០០២ ដោយគ្មានក្រុមការងារសូម្បីម្នាក់ ហើយក៏បានបរាជ័យលើការងារនេះច្រើនដងមកហើយ(បង្កើតដំបូងអ្នកចូលតែជាង ៥០ នាក់ប៉ុណ្ណោះ)។ ប៉ុន្តែមកទល់ពេលនេះ Khmer24 ក្លាយជាវិបសាយឈានមុខគេ ខាងលក់ដូរទំនិញ ជាពិសេសគឺផ្ទះនិងរថយន្ត។ ក្នុងមួយខែៗមានអ្នកទិញ និងលក់ទំនិញច្រើនជាង កន្លះលាននាក់។

#៥) លោក បេ ចន្រ្តា ស្ថាបនិករៀបចំព្រឹត្តិការណ៍បារខែមដំបូងគេនៅកម្ពុជា

ជាស្ថាបនិកដ៏សំខាន់ក្នុងការរៀបចំព្រឹត្តិការណ៍បារខែមដំបូងគេនៅកម្ពុជាតាំងពីឆ្នាំ ២០០៨។ លោកបានខិតខំបង្កើតកម្មវិធីនេះទាំងបាតដៃទទេ មានក្រុមការងារតែប៉ុន្មាននាក់ប៉ុណ្ណោះ ដែលផ្តោតលើការវិវឌ្ឍន៍នៃវិស័យបច្ចេកវិទ្យា មានវាគ្មិនជំនាញៗនឹងលើកយកចំណេះដឹងនិងរបកគំហើញថ្មីៗ ចែករំលែកដល់អ្នកចូលរួមឲ្យបានយល់ដឹងពីបច្ចេកវិទ្យា ជាពិសេសយុវវ័យដែលចង់ចាប់ជំនាញផ្នែកបច្ចេកទេស។

#៦) លោក អៀ អ៊ុយ អ្នកផលិតហ្គេមខ្មែរដាក់លើទូរសព្ទដៃ Asva the Monkey

ជាអ្នកផ្ដួចផ្ដើមបង្កើតក្រុម Osja Studio ហើយក៏ជាអ្នកអភិវឌ្ឍន៍អាជីវកម្មផលិតហ្គេមដំបូងគេនៅកម្ពុជា។ ហ្គេមរបស់លោកទទួលស្គាល់នៅលើឆាកអន្តរជាតិ និងទទួលបានរង្វាន់ស្នាដៃលើកទឹកចិត្តយ៉ាងសន្ធឹកមានដូចជាហ្គេម Asva The Monkey។ មុននឹងជោគជ័យបែបនេះ លោកក៏ធ្លាប់បរាជ័យផលិតហ្គេមជាច្រើនលើកផងដែរ ប៉ុន្តែក៏នៅតែតស៊ូបង្កើតស្នាដៃថ្មីៗជាបន្តបន្ទាប់ដើម្បីឲ្យវិស័យផលិតហ្គេមនៅកម្ពុជារីកចម្រើនជាងមុន។

យ៉ាងណាមិញកាលពីឆ្នាំមុន ក្រុមលោកបានបញ្ចេញស្នាដៃបង្កើតបច្ចេកវិទ្យា AR ដាក់លើក្រដាសប្រាក់រៀលខ្មែរ ហើយថែមទាំងអាចផលិតចេញជារូបភាពផ្សេងៗបាន ធ្វើឲ្យមហាជនស្ងើចសរសើរជាខ្លាំង។ បញ្ជាក់ដែរថា បច្ចេកវិទ្យា AR ជាផ្នែកមួួយនៃបច្ចេកវិទ្យានាពេលអនាគត ប៉ុន្តែក្រុមលោកអាចធ្វើបានមុនគេនៅកម្ពុជា។

#៧) លោក គ្រុយ វណ្ណា ស្ថាបនិកក្ដារចុចឆ្លាតវៃ

នៅពាក់កណ្ដាលឆ្នាំ ២០១៤ លោកបានបង្កើតក្ដារចុចសម្រាប់ iOS មានឈ្មោះថា khmer Smart Keyboard ជាមួយនឹងក្រុមការងារ Alien Dev។ ត្បិតតែក្ដារចុចនេះ មិនមែនជាការរកឃើញដំបូងគេនៅកម្ពុជា តែដោយសារភាពរលូន និងការច្នៃប្រឌិតថ្មីនៅលើក្ដារចុចខ្មែរ ធ្វើឲ្យស្នាដៃដំបូងរបស់លោកទទួលបានការគាំទ្រយ៉ាងខ្លាំង។

ទោះជាយ៉ាងនេះក្ដីមកដល់ឆ្នាំ ២០១៧ ក្រុមលោកក៏បានបែកខ្ញែកគ្នាអស់ នៅសល់តែស្នាដៃប៉ុណ្ណោះសម្រាប់ទុកឲ្យ Developer ជំនាន់ក្រោយៗបន្តកិច្ចការនេះ។

#៨) លោក ជា ឡង់ដា ស្ថាបនិកកម្មវិធីកក់សំបុត្ររថយន្តអនឡាញលើទូរសព្ទដៃដំបូងគេ

ជាអតីតនិស្សិតជំនាញវិទ្យាសាស្ត្រកុំព្យូទ័រ ដែលសុខចិត្តបោះបង់ការងារជាអ្នកអភិវឌ្ឍកម្មវិធី មកចំណាយពេល បង្កើតកម្មវិធីកក់សំបុត្រឡានតាមអនឡាញលើទូរសព្ទដៃ រហូតជោគជ័យទទួលបានជយលាភីលេខ ១ ពានរង្វាន់ Cambodia ICT Award ប្រចាំឆ្នាំ ២០១៦ និងក្លាយជាកម្មវិធីកក់សំបុត្ររថយន្តតាមអនឡាញដំបូងគេនៅកម្ពុជា សម្រាប់សម្រួលដល់ការធ្វើដំណើរប្រចាំថ្ងៃ។

#៩) លោក មាស ស៊ីណាល់ ស្ថាបនិកវេបសាយកក់សណ្ឋាគារអនឡាញដំបូងគេ

ដោយឃើញថាយុវវ័យភាគច្រើនពិបាកស្វែងរកព័ត៌មានពីកន្លែងស្នាក់នៅពេលចង់ដើរលេងនៅកន្លែងស្អាតៗជុំវិញប្រទេសកម្ពុជាដូចជា ខេត្តសៀមរាប ព្រះសីហនុ កំពត ឬតាមបណ្ដាខេត្តនានា។

លោកក៏បានបោះបង់ការងារជាអ្នកអភិវឌ្ឍកម្មវិធីវិបសាយ(Web Developer) នៅក្នុងក្រុមហ៊ុនមួយកន្លែង មកចាប់ផ្ដើមបង្កើតវិបសាយកក់សណ្ឋគារតាមអនឡាញ Bayonia ដែលជាវេបសាយក្នុងស្រុកដំបូងគេ។ ក្រោយពីឆ្លងកាត់ឧបសគ្គរាប់មិនអស់ ឥឡូវសេវាកម្មកក់អនឡាញនេះទទួលបានការគាំទ្រយ៉ាងខ្លាំង មានទាំងបរទសផងដែរ ស្ញើចសរសើរពីសេវាកម្មថាល្អមិនចាញ់វិបសាយបរទេសដូចជា Booking.com ជាដើម។

#១០) កញ្ញា ប្លុង ម៉ាលីពណ៌ ស្ថាបនិកកម្មវិធីមើលចំណតរថយន្តក្រុងសាធារណៈ

ទោះជារវល់នឹងការងារបង្រៀនក៏ដោយ តែសាស្ត្រាចារ្យវ័យក្មេងរូបនេះបានប្រឹងប្រែង និងឆ្លៀតពេលទំនេរមកបង្កើតកម្មវិធីកម្មវិធី Stop Near Me ឬកម្មវិធីចំណតក្បែរខ្ញុំដោយម្នាក់ឯង ដោយគ្មានក្រុមការងារនោះទេ។

កម្មវិធីទូរសព្ទដៃនេះជា បានក្លាយជាកម្មវិធីថ្មីមួយ និងដំបូងគេក្នុងប្រទេសកម្ពុជា សម្រាប់ជួយដោះស្រាយបញ្ហាការពិបាកស្វែងរកចំណតឡានក្រុងធ្វើដំណើររបស់ពលរដ្ឋ។

#១១) លោក ខេង វ៉ាន់ថា ស្ថាបនិកបង្កើតវចនានុក្រមខ្មែរដំបូងគេលើទូរសព្ទ

ជាអ្នកត្រួសត្រាយផ្លូវបង្កើតវចនានុក្រមអង់គ្លេស-ខ្មែរ, ខ្មែរ-អង់គ្លេស និងខ្មែរ-ខ្មែរ ដំបូងគេសម្រាប់ប្រើប្រាស់លើទូរសព្ទ។ កាលចេញជំនាន់ដំបូង អាចប្រើបានទាំងនៅលើស៊េរីទូរសព្ទ Symbian របស់ក្រុមហ៊ុន Nokia និងការបង្កើតវចនានុក្រមសម្រាប់ប្រើនៅលើ Window Mobile បន្ថែមក្ដារចុចអក្សរខ្មែរ សម្រាប់អានឬមើលនៅលើទូរសព្ទ។

លោកក៏បានបង្កើតវចនានុក្រមមួយទៀតគឺវចនានុក្រមភូមិ(Phum Dictionary) សម្រាប់ប្រើនៅលើទូរសព្ទមួយចំនួន ដែលដំណើរការណ៍ដោយ Android ផងដែរ។

#១២) ក្រុមអ្នករចនាពុម្ពអក្សរខ្មែរ

អ្នករចនាពុម្ពអក្សរទាំងអស់ក្នុងក្រុមសុទ្ធតែពុំរៀន IT ដោយអ្នកខ្លះរៀនខាង សេដ្ឋកិច្ច អក្សរសាស្ត្រអង់គ្លេស និងជំនាញផ្សេងៗជាដើម។ តែដោយមានឆន្ទៈស្រឡាញ់ការរចនាពុម្ពទើប ប្រឹងប្រែងដល់សព្វថ្ងៃ។ អ្នកខ្លះត្រូវឆ្លៀតពេលទំនេរពីរៀន មករចនាពុម្ពអក្សរថ្មីៗ ឯខ្លះទៀតឆ្លៀតធ្វើនៅចង្ក្រានបាយក៏មាន។

ក្រុមអ្នករចនាពុម្ពអក្សរខ្មែរ បានចំណាយពេលប្រហែល ៣ ឆ្នាំ រចនាពុម្ពអក្សរបានដល់ទៅជាង ៣០០ ម៉ូដ តែគ្មានការលើកទឹកចិត្តពីស្ថាប័នដែលយកពុម្ពអក្សរទៅប្រើឡើយ។ មកទល់ពេលនេះពួកគេបានបែកខ្ញែកគ្នាអស់ហើយ នៅសល់តែពុម្ពអក្សរតាមម៉ូឌដែលពួកគេបានបង្កើតឡើង។

*អាចបញ្ចេញមតិ ឬបង្ហាញស្នាដៃឲ្យក្រុមការងារដឹងផង បើប្រិយមិត្តបង្កើតបានស្នាដៃថ្មីដំបូងគេជាប្រយោជន៍សាធារណៈដូចបុគ្គលឆ្នើមៗខាងលើ។

អត្ថបទទាក់ទង៖

អត្ថបទ៖ រក្សា

Hot News Todays