សមាជិកក្រុមជម្រើសជាតិកម្ពុជា និងអតីតរបស់ក្លឹបភ្នំពេញក្រោន កែវ សុខផេង ជួបបញ្ហាលំបាកខ្លះៗនៅពេលរូបគេបានទៅលេងក្នុងលីគកំពូលរបស់ប្រទេសម៉ាឡេស៊ីដែលដំណើរការបាន៤សប្តាហ៍កន្លងទៅហើយ។
កែវ សុខផេង រត់លើទីលាន (រូបថត៖ PKNP FC OFFICIAL)
កែវ សុខផេង បានប្រាប់ថា រហូតដល់ពេលនេះ រូបគេនៅមិនទាន់លេងយល់ចិត្តគ្នាជាមួយមិត្តរួមក្រុមឡើយ។ របៀបលេងនៅលីគកំពូលម៉ាឡេស៊ីមិនលើសលីគបាល់ទាត់កំពូលកម្ពុជាប៉ុន្មានឡើយ ប៉ុន្តែគ្រាន់តែថា រូបគេជាសមាជិកថ្មី ដូច្នេះនៅមិនទាន់លេងយល់ចិត្តគ្នាជាមួយក្រុម ដូចដែលធ្លាប់លេងជាមួយក្រុមនៅកម្ពុជាដែលស្គាល់សមាជិកក្រុមច្បាស់។ យ៉ាងណា រូបគេនឹងខិតខំប្រឹងប្រែងឲ្យអស់ពីសមត្ថភាពដើម្បីឲ្យកាន់តែល្អប្រសើរឡើង។
ប្អូនប្រុស កែវ សុខង៉ន បន្តឲ្យដឹងទៀតថា ៖«បញ្ហាមួយទៀតដែលលំបាកសម្រាប់ខ្ញុំគឺការលេងបាល់លើ។ ក្រុមលីគម៉ាឡេស៊ីចូលចិត្តលេងបាល់លើ ដូច្នេះហើយវាជាបញ្ហាលំបាកសម្រាប់ខ្ញុំដែលធ្លាប់លេងបាល់ក្រោម»។
សុខភាពក៏ជាបញ្ហាមួយសម្រាប់សមាជិកជម្រើសជាតិកម្ពុជា កែវ សុខផេង។ សមាជិកក្លឹប Perbadanan Kemajuan Negeri Perak (PKNP) ប្រាប់ថា ពេលទៅលេងនៅប្រទេសម៉ាឡេស៊ី សុខភាពរបស់គេមានបញ្ហាតិចតូចដែលធ្វើឲ្យលំបាកខ្លះៗ។ ទោះយ៉ាងណា កីឡាកររូបនេះមិនបានបញ្ជាក់ថា មានបញ្ហាសុខភាពអ្វីឲ្យច្បាស់នោះទេ។
កែវ សុខផេង បានក្លាយជាកីឡាករបាល់ទាត់កម្ពុជាទីមួយដែលរកគ្រាប់បាល់បាននៅលីគកំពូលរបស់ម៉ាឡេស៊ី បន្ទាប់ពីផ្លាស់ពីភ្នំពេញក្រោនទៅក្លឹប PKNP។ ចំណែកកីឡាករកម្ពុជា៣នាក់ទៀតគឺ ចាន់ វឌ្ឍនាកា ធារី ចន្ថាប៊ីន និង ប្រាក់ មុន្នីឧត្តមនៅមិនទាន់រកគ្រាប់បាល់បានឡើយ៕
កែវ សុខផេង (រូបថត៖ PKNP FC OFFICIAL)
អត្ថបទ៖ ជាន ចាន់រ៉ា
No comments:
Post a Comment