ប្រធានទទួលបន្ទុករើសបុគ្គលិក របស់ក្រុមហ៊ុនដឹកជញ្ជូនមួយនៅសហរដ្ឋអាមេរិក ត្រូវបានបណ្ដេញចេញពីការងារក្រោយត្រូវបានរកឃើញថា ប្រើពាក្យសំដីបែបរើសអើងទៅលើបុរសជនជាតិវៀតណាមម្នាក់ដែលដាក់ពាក្យសុំធ្វើការ។
លោក Huynh
បុរសដែលកាន់តួនាទីជាប្រធានទទួលខុសត្រូវលើការរើសបុគ្គលិករបស់ក្រុមហ៊ុន Dash Delivery LLC រូបនេះ មានឈ្មោះ Bruce Peterson បានឆ្លើយតបសារដ៏មានសភាពរើសអើង ទៅកាន់បុរសជាតិវៀតណាមម្នាក់ឈ្មោះ Minh Huynh ដែលបានដាក់ពាក្យសុំធ្វើការក្នុងក្រុមហ៊ុនក្នុងនាមជាអ្នកបើកបរ។ ដោយសារ Huynh មិនមានសមត្ថភាពភាសាអង់គ្លេសគ្រប់គ្រាន់ ក៏ត្រូវបាន Peterson បដិសេធ។
ទោះជាយ៉ាងណា ក្នុងការបដិសេធនេះ Peterson មិនបានប្រើពាក្យត្រឹមត្រូវស្របតាមវិជ្ជាជីវៈឡើយ តែបែរជានិយាយបែបចំអកថា៖ “If you no speak English. I will send you home” (បើសិនជាអ្នកឯងមិនអាចនិយាយអង់គ្លេសនោះទេ ខ្ញុំនឹងបញ្ជូនអ្នកឯងទៅស្រុកអ្នកឯងវិញ)។
សារដ៏ចម្រូងចម្រាសនេះត្រូវបានកូនស្រីរបស់លោក Huynh បង្ហោះលើ Twitter កាលពីម្សិលមិញ។ សារបានទាក់ទាញចំណាប់អារម្មណ៍ និងកំហឹងជាខ្លាំងពីបណ្ដាសាធារណៈមតិនៅលើបណ្ដាញសង្គម ដោយភាគច្រើនបានហៅសំដីរបស់លោក Peterson គឺជាសាររើសអើងទៅលើជនជាតិអាស៊ីនៅអាមេរិក។
ការណ៍នេះ បានធ្វើឲ្យរឿងល្បីដល់ក្រុមហ៊ុន Dash Delivery LLC ។ ក្នុងថ្ងៃនេះក្រុមហ៊ុនដែលមានមូលដ្ឋាននៅវ៉ាស៊ីនតោនមួយនេះ បានធ្វើការបញ្ឈប់លោក Peterson ពីតំណែង ហើយក៏បានចេញលិខិតសុំទោសជាផ្លូវការដល់លោក Huynh និងក្រុមគ្រួសាររបស់លោកចំពោះទង្វើមិនសមរម្យរបស់អតីតបុគ្គលិកខ្លួន៕
No comments:
Post a Comment